Jalǵan vaktsına pasportyn jasaǵandardy polıtsııaǵa ózimiz tapsyrdyq – Narıman Tabynbaev
Onyń aıtýynsha, Almaty medıtsınalyq mekemelerinde vaktsına qujattaryn qoldan jasaýdyń eki jaǵdaıy anyqtalyp, dáleldengen.
Onyń birinshisi osydan 2,5 aı buryn №21 emhanada anyqtalsa, ekinshisi №4 qalalyq emhanada belgili boldy.
«Bul jaǵdaılardy qoǵamdyq densaýlyq saqtaý basqarmasy ózi anyqtady. Sonymen qatar, osyǵan qatysty jaǵdaıdy Polıtsııa departamentine ózimiz joldadyq. Qazir taǵy bir emdeý ornynyn anyqtaý boıynsha polıtsııaǵa júgindik. Sondaı-aq mundaı jaǵdaı qaıtalanbas úshin quqyq qorǵaý organdarymen birge vaktsına salynatyn oryndarda túsindirý jumystaryn júrgizip jatyrmyz, - dedi ol.
Sonymen qatar, ol jalǵan vaktsına pasportyn jasaǵan medıtsına qyzmetkerlerine qandaı jaza qoldanylatynyn aıtty.
«Bul adamdar jalǵan qujat jasap, vaktsınany joıǵan. Qazir olarmen polıtsııa qyzmetkerleri jumys istep jatyr. Al, mekeme basshylary jumystaryn jalǵastyrýda. Tergeý jumystary aıaqtalǵan soń bári belgili bolady»,-dedi basqarma basshysy.
Buǵan deıin, qaladaǵy «Dostar Med» jáne «Suńqar» qyzmetkerleri jalǵan qujattar jasaǵany úshin ustalǵany, sondaı-aq №4 emhanada medıtsınalyq qyzmetkerlerdiń vaktsınatsııa pasporttaryn satqany jáne vaktsınalardy zańsyz joıǵany týraly habarlaǵan bolatynbyz.