Jalǵan ýrbanızatsııa úderisi qalalardyń damýyna kedergi bolmaýy kerek - Baýyrjan Muqan
«QR Prezıdenti Qasym-Jomart Toqaev Qazaqstan halqyna arnaǵan Joldaýynda ýrabanızatsııa, óńirlerdi damytý tóńiregindegi mańyzdy máselelerdi kóterdi. Máselen, elimizde ýrbanızatsııanyń deńgeıi 2014 jyly 56,6% bolsa, qazirgi tańda 58,9%-dy quraıdy. Jalǵan ýrbanızatsııa úderisi qalalardyń damýyna kedergi bolmaýy qajet. Demek, áleýmettik, ınjenerlik, kóliktik ınfraqurylymǵa qosymsha júkteme túsirmeı halyqtyń tabıǵı ósimin negizge ala otyryp, ınfraqurylymdyq qamtamasyz etý saıasaty júzege asyrylýy tıis. Sebebi joǵary sapaly qoljetimdi ınfraqurylymdardyń damýy halyqtyń sapaly ómir súrý jaǵdaıyna tikeleı áser etedi», - deıdi «Ekonomıkalyq zertteýler ınstıtýty» AQ Basqarma tóraǵasynyń orynbasary.
Sondaı-aq, Baýyrjan Muqan Joldaýda aıtylǵan terrıtorııalyq damýdyń jańa satysy – el ekonomıkasyna oń áser tıgizetinin atap ótti.
«Joǵary tehnologııalyq damý sektorynyń Qazaqstan ekonomıkasyndaǵy úlesi 2-3% ǵana. Árıne, bul óte tómen kórsetkish. Sondyqtan, ǵylym men tehnologııanyń damýyna barlyq óńirlerdiń jappaı jumyldyrylýy nemese ınnovatsııalyq ortanyń birdeı qalyptasýy ekitalaı. Al, Memleket basshysynyń Shyǵys Qazaqstan, Qaraǵandy jáne Pavlodar oblystarynyń joǵary tehnologııalar, ǵylymı aýqymdy óndiristiń jáne tehnıkalyq qyzmettiń ortalyǵy bolýyna qatysty pikiri osy óńirlerdiń úlken múmkindikteri bar ekendigin aıqyndap otyr», - dep túıindedi Baýyrjan Muqan.
Avtor: Álıhan Asqar