Jalǵan UBT sertıfıkatymen qujat tapsyrǵandar isi quqyq qorǵaý organdaryna joldandy

ASTANA. KAZINFORM – Ulttyq testileý ortalyǵy UBT sertıfıkattaryn qoldan jasaý boıynsha onnan astam buzýshylyq tirkelgenin málimdedi.

«Ókinishke oraı, bıyl jalǵan UBT sertıfıkattaryn usyný jaǵdaıy anyqtaldy. Qazirgi ýaqytta grant konkýrsyna qujattar qabyldanýda jáne qabyldaý komıssııalaryna jalǵan sertıfıkattar usyný boıynsha 10-nan astam áreket tirkelgen», - deıdi testileý ortalyǵy.

Ortalyq UBT sertıfıkatyn qoldan jasaý múmkin emes ekenin eske saldy.

«Árbir sertıfıkatta onyń túpnusqalyǵyn birden tekserýge múmkindik beretin biregeı QR kody bar. Sondaı-aq, UBT sertıfıkaty resmı qujat bolyp tabylady jáne ony qoldan jasaý QR Qylmystyq kodeksiniń 385-baby boıynsha qylmystyq jaýapkershilikke ákep soǵady. Mysaly, myna sertıfıkatta QR-kod ashylmaıdy, sandar ár túrli shrıftpen, ár túrli kólemde jazylǵan», - dep túsindirdi ortalyq.

Sertıfıkattardy qoldan jasaýǵa tyrysýdyń barlyq jaǵdaıy tıisti sharalar qabyldaý úshin quqyq qorǵaý organdaryna joldanady.

«Dostar! Sizderdi zań buzýshylyqqa barmaýǵa shaqyramyz. Jalǵan qujattardy qoldan jasaý aýyr saldarǵa, al shynaıy eńbegińiz ben adaldyǵyńyz teńdesi joq tabys ákeletinine senemiz», - deıdi Ulttyq testileý ortalyǵy.

UBT sertıfıkaty app.testcenter.kz saıtynda jeke kabınette, certificate.testcenter.kz saıtynda jáne eGov elektrondyq úkimet portalynda qoljetimdi.