Jalǵan tranzıtti boldyrmaý úshin júk kólikterine navıgatsııalyq plombalar ilinedi – komıtet
ASTANA. QazAqparat – Qazaqstan aýmaǵy arqyly ótken jalǵan tranzıt 0,3%-ǵa deıin tómendedi, dep habarlaıdy QazAqparat Memlekettik kirister komıtetine silteme jasap.
Kóleńkeli taýar aınalymyn boldyrmaý maqsatynda Qazaqstan, Reseı jáne Qyrǵyz Respýblıkasynyń fıskaldy organdary ózara is-qımyl jasaýda. Osy maqsatta jıi kezdesýler ótip, birqatar kelisimder ornaǵan.
Qazaqstan men Qyrǵyzstan arasyndaǵy saýda-ekonomıkalyq yntymaqtastyq jónindegi jumys tobynyń ekinshi otyrysynda (2022 jylǵy 8-9 qyrkúıek, Bishkek) jasalǵan kelisimder negizinde 2022 jyldyń 1 qazanynan 2023 jyldyń 1 sáýirine deıin Qyrǵyzstannan Reseı Federatsııasyna baǵyttalǵan júk kólikterine navıgatsııalyq plombalar ilý boıynsha pılottyq joba júrgizildi.
Qazaqstan Úkimetiniń 2023 jylǵy 12 qańtardaǵy №17 qaýlysymen Halyqaralyq avtomobıl tasymaldaryn qadaǵalaý jónindegi ulttyq operator bolyp «Ǵaryshtyq tehnıka jáne tehnologııalar ınstıtýty» EJShS bekitildi.
«2023 jylǵy 1 maýsymnan bastap, Qyrǵyz Respýblıkasy jáne Reseı Federatsııasymen ózara saýda sheńberinde taýarlardyń avtomobıl jáne temirjol tasymalyn qadaǵalaý boıynsha halyqaralyq pılottyq joba júrgizilýde. Navıgatsııalyq plombalar Qazaqstan aýmaǵynan ótetin taýarlardy naqty ýaqyt rejıminde qadaǵalaýǵa múmkindik beredi jáne jalǵan tranzıt faktilerin boldyrmaýǵa, naqty ımporttaýshyny aıqyndaýǵa baǵyttalǵan», - dep jazylǵan komıtet habarlamasynda.
Atalǵan ılottyq joba qańtar-maýsym aılarynda QR arqyly EAEO elderine tranzıtpen ótken barlyq 25 myń júk kólikteriniń Qyrǵyzstannan jalǵan tranzıt úlesin 0,3%-ǵa deıin tómendetýge yqpal etti.
Osyǵan deıin jalǵan tranzıt úlesi tek Qyrǵyz Respýblıkasynan 2019 jyly 21% (5,4 myń fakt), 2020 jyly – 13% (4,2 myń fakt) quraǵan bolatyn. 2021 jyly qabyldanǵan sharalar arqyly jalǵan tranzıt úlesi 0,8%-ǵa (287 fakt), 2022 jyly 0,6%-ǵa (262 fakt) deıin qysqarǵan.
