Jalǵan taýar óndirýshilermen kúres: Elimizde biryńǵaı ashyq reestr ázirlenip jatyr
ASTANA. KAZINFORM - Elimizde otandyq taýarlardyń jáne taýar óndirýshilerdiń biryńǵaı ashyq reestri ázirlenip jatyr. Bul týraly «Adal azamat. Adal eńbek. Adal bıznes» forýmynda «Atameken» ulttyq kásipkerler palatasynyń Shaǵyn jáne orta bıznes forýmynda QR Premer-mınıstri Oljas Bektenov málimdedi.
«Eń mańyzdy máselelerdiń biri – otandyq taýar óndirýshilerdiń shynaıylyǵyn tekserý. Bárimiz «jalǵan taýar óndirýshiler» jaıly bilemiz. Olar memlekettik qoldaýdyń tolyq keshenine qol jetkizedi. Otandyq óndiriske eshqandaı úles qospaı, tek ımporttalǵan taýarǵa «Qazaqstanda jasalǵan» tańbasyn basý arqyly ǵana jeńildetilgen jolmen memlekettik satyp alýlarǵa qatysady. Mine, osy sebepti biz qazir «Otandyq taýarlardyń jáne taýar óndirýshilerdiń biryńǵaı ashyq reestrin» ázirlep jatyrmyz», - dedi Úkimet basshysy.
Oljas Bektenov adamı faktorlar men jemqorlyq qaýpinen qorǵaný, kompanııalardyń qyzmetine barynsha ashyq taldaý jasaý jáne shyn máninde taýar óndiretin kompanııalardy anyqtaý úshin bul salada tsıfrlandyrý barynsha keń qoldanylyp jatqanyn atap ótti.
Aıta keteıik, keshe elordada «Atameken» Ulttyq kásipkerler palatasynyń XXII sezi ótti. Onda otandyq kásipkerlerdiń qordalanǵan suraqtary talqylanyp, 204 mańyzdy másele Úkimetke joldanatyn boldy.
