Jalǵan tarıh jasaýdyń qajeti joq – Májilis depýtaty
ASTANA. KAZINFORM — Tarıh shyndyǵyn moıyndaý uly halyqtardyń ǵana qolynan keledi. Mundaı pikirdi BIZDIÑ ORTA podkasynda Májilis depýtaty Edil Jańbyrshın bildirdi.
— Jalǵan tarıh jasap qajeti joq. Erteń áshkere bolyp qalady. Sondyqtan bardy bar, joqty joq dep jazý kerek. Bolmaǵan dúnıeni boldy dep qatty ásireleýden, «osy dúnıede tek biz myqty memleketpiz, halyqpyz» dep asyra silteýshilikten aıaǵymyzdy tartýymyz qajet. Eń bastysy aqtańdaqtyń bárin ádil kórsetip, ashyq aıtýymyz qajet. Tipti keı jerde jibergen qatelikterimiz úshin de keshirim suraýymyz kerek shyǵar. Sebebi tarıh shyndyǵyn, ádildigin moıyndaý uly halyqtardyń ǵana qolynan keledi, — dedi Edil Jańbyrshın.
Osy oraıda Májilis depýtaty qazaq halqynyń tarıhynda uly jeńisterdiń de az bolmaǵanyn basa aıtty.
— Sonyń arqasynda osyndaı ulǵan-ǵaıyr jerdi alyp qaldyq. Sonyń arqasynda osy kúnge deıin memleket bolyp ómir súrip kelemiz. Tilimizdi de, dinimizdi de, dilimizdi de joǵaltpadyq. Árıne, bizde jeńilister de boldy. Ony jasyrmaýymyz qajet. Erteń qaıtalamas úshin sabaq bolýy tıis. Sondyqtan tarıh ádil, shyn jazylýy tıis dep esepteımin, — dedi ol.
Buǵan deıin Edil Jańbyrshın elimizdiń ishki saıasatyndaǵy sharýanyń bárin júıeleıtin birtutas tujyrymdamalyq qujat doktrına ne strategııa bolýy tıistigin aıtqan edi.