Jalǵan statıstıkaǵa jalǵyz adam kináli emes — Aıdarbek Saparov
ASTANA. KAZINFORM — Aýyl sharýashylyǵy mınıstri Aıdarbek Saparov Kazinform-ǵa bergen suhbatynda agroónerkásip salasynda jalǵan esep berý arqyly statıstıkany qoldan ósirý qashan kelmeske ketetinin aıtty.
— Shyn máninde siz aıtyp otyrǵan qosyp jazýlar jyldar boıy qordalanǵan. Bul jerde jalǵyz aıypty joq. Másele problemany qalaı sheshýge tirelip tur. Mınıstrlik Memleket basshysynyń tapsyrmasy boıynsha jalǵan statıstıkany joıý jumystaryn qolǵa aldy. Ulttyq statıstıka bıýrosymen jáne ákimdiktermen birge eldegi jaǵdaıdy shyndyqpen sáıkestendire aldyq. Shynaıy statıstıkanyń arqasynda jaǵdaıdy shynaıy baǵamdap, durys sheshim qabyldaýǵa bolady, — deıdi mınıstr.
Aıdarbek Saparov qosyp jazý bolmaý úshin úzdiksiz qadaǵalaý júıesi iske qosylǵanyn aıtady.
— Mundaı tásilderdi birtindep, sala ókilderi beıimdele alatyndaı qarqynmen engizý kerek. Sonda olarda ashyq jumys isteýge boı úırete alady. Júıeni tolyq engizgen kezde qosyp jazý máselesi kelmeske ketedi dep oılaımyn, — deıdi Aýyl sharýashylyǵy mınıstri.
Buǵan deıin Qazaqstan statıstıkamen jumys isteýge arnalǵan AI-kómekshini iske qosqanyn jazǵan edik.
