Jalǵan shot-faktýra jazǵan oraldyq kásipkerge 6,3 mln teńge aıyppul salyndy
QR Qarjy mınıstrligi Qarjy monıtorıngi komıtetiniń baspasóz qyzmeti málim etkenindeı, BQO boıynsha ekonomıkalyq tergeý departamenti atalǵan turǵynnyń 2017-2019 jyldar aralyǵynda memleketke 67 mln teńge zalal keltirgenin anyqtady.
Atap aıtqanda, ol JShS-yn paıdalanyp, is júzinde jumystardy oryndamaı, qyzmetterdi kórsetpeı jáne taýarlardy tıep-jóneltpesten shot-faktýra jazǵan. Sol arqyly óziniń kommertsııalyq kásipornyn salyq tóleýden zańsyz bosatqan.
Oral qalasy sotynyń úkimimen kásipker QR QK 28-baby 2-bóligi jáne 216-baby 2-bóligi 2-tarmaǵyna sáıkes aıypty dep tanyldy.
Sottalýshymen kináni moıyndaý týraly mámile túrinde protsessýaldyq kelisim jasaldy. Sondaı-aq onyń Qylmystyq-protsestik kodekste qarastyrylǵan kelisimniń barlyq sharttaryn oryndaǵany, sonyń ishinde keltirilgen zııandy tolyq ótegeni eskerildi.
Osylaısha kásipkerge 6 mln 312,5 myń teńge aıyppul salyndy.
