Jalǵan shetel valıýtasyn ótkizý faktileri jıilep ketken – Qarjylyq monıtorıng agenttigi
ASTANA. KAZINFORM – Qarjylyq monıtorıng agenttigi jalǵan shetel valıýtasyn ótkizý faktileriniń jıilep ketkeni jaıly habarlady.
Máselen, Almaty q. jalǵan 100 dollarlyq kýpıýralardy satýmen aınalysqan tulǵalar toby anyqtaldy. Qylmysqa qatysýshylardyń biriniń turǵylyqty jerin tintý barysynda 149 dana (14 900 AQSh dollary) jalǵan dollar tabyldy. Quqyq buzýshylar ustalyp, sot olarǵa qamaýda ustaý túrindegi bultartpaý sharasyn sanktsııalady.
Sonymen qatar Batys Qazaqstan oblysynda QMA polıtsııamen birlesip jalǵan valıýtany ótkizý faktisi anyqtady. Bir top adam Oral qalasyndaǵy lotereıa klýbtarynyń birinde jalǵan 25 000 AQSh dollary men 10 000 evro ótkizgen degen kúdikke ilikti.
Kúdiktiler bás tigý maqsatynda bul qarajatpen shottaryn tolyqtyrǵan.
Jalǵan aqshany satýshyǵa qatysty sottyń sanktsııasymen «qamaýda ustaý» túrindegi bultartpaý sharasy tańdaldy. QPK-niń 201-baby tártibindegi ózge de aqparat jarııa etýge jatpaıdy.
Aıta keteıik, jyl basynan beri Qazaqstan aýmaǵynda aınalymnan 1 060 jalǵan banknot tárkilendi, onyń ishinde ulttyq valıýtada 647 000 teńge somasyna 141 dana, 90 400 AQSh dollaryna 905 kýpıýra, 2 000 eýroǵa 4 kýpıýra, 1 000 ıýan somasyna 10 kýpıýra. Alynǵan jalǵan banknottardyń jalpy somasy 43 mln teńgeden asady.
Buǵan deıin 2024 jyly jalǵan kýpıýralardy jasap, ótkizgeni úshin 8 adam 5 jyldan 6 jylǵa deıingi merzimge bas bostandyǵynan aıyryldy.
