Jalǵan senimhat arqyly banktegi bireýdiń shotynan 69 mln. teńgeni jymqyrǵan alaıaq ustaldy
ASTANA. 31 tamyz. QazAqparat /Qanat Mámetqazyuly/ - Ótken aptada Astana qalasynda Uıymdasqan qylmysqa qarsy kúres basqarmasynyń qyzmetkerleri arnaıy is-sharalar júrgizý barysynda iri mólsherde alaıaqtyq jasaǵany úshin kúdikti 37 jastaǵy jergilikti turǵyndy ustady.
Bul týraly búgin QR ІІM ótken brıfıngte vedomstvonyń baspasóz hatshysy Nurdildá Oraz málim etti.
«Tamyzdyń orta kezinde 38 jastaǵy jeke kásipker ekinshi deńgeıdegi banktegi óziniń depozıttik esebinen 69 mıllıon teńgeni belgisiz bireýdiń alǵany týraly shaǵymdanǵan bolatyn. Jedel-izdestirý is-sharalary barysynda onyń kásipkerdiń depozıttegi shotynan 400 myń AQSh dollaryn jáne 10 mıllıon teńgeni alǵany anyqtaldy. Kúdikti depozıttegi shotty paıdalanýǵa jáne oǵan ıelik etýge senimhatty qoldan jasaǵan eken. Alaıaq shottaǵy qalǵan somany almaqshy bolyp, kelesi kúni bankke kelgen sátinde ustaldy. Qazir ýaqytsha ustaý ızolıatoryna qamalyp, osyǵan uqsas qylmystarǵa qatystylyǵy tekserilýde», - deıdi Nurdildá Oraz. Búgingi kúni sybaılastaryn jáne onyń urlanǵan aqshasyn izdestirý jumystary jalǵasýda. Bul rette jedel top qyzmetkerleri qylmys jasaýǵa bank qyzmetkerleriniń de qatysty bolýy múmkindigin joqqa shyǵarmaıdy. «Aıta keterligi, kúdikti buǵan deıin de tonaý jasaǵany jáne esirtki saqtaǵany úshin buryn sottalǵan, rıelterlik qyzmet kórsetý salasynda jumys istegen eken», - dedi N. Oraz.
