Jalǵan retsept: Medıtsına qyzmetkerlerinen qurylǵan uıymdasqan qylmystyq top áshkerlendi
ASTANA. KAZINFORM — Túrkistan oblysynda medıtsına qyzmetkerlerinen qurylǵan uıymdasqan qylmystyq top áshkerlendi. Olar uzaq ýaqyt boıy «tramadol» preparatyn alý úshin jalǵan retsepter jasap kelgen. Bul týraly Polisia.kz jazdy.
Barlyq tulǵalar ustaldy, tergeý amaldary júrgizilip jatyr.
Bul qylmysty Іshki ister mınıstrligi 9-13 maýsym aralyǵynda elimizdiń aýmaǵynda esirtki quraldarynyń, psıhotroptyq zattar men prekýrsorlardyń zańdy aınalymyn baqylaý maqsatynda «Dármek» jedel-aldyn alý is-sharasynyń ekinshi kezeńi ótkizý barysynda áshkerelegen.
— 709 nysan tekserildi, onyń ishinde 577 medıtsınalyq mekeme jáne 132 óndiristik kásiporyn. Іs-shara kezinde 237 ákimshilik quqyqbuzýshylyq anyqtaldy. Esirtkilik jáne psıhotroptyq zattar bar 23 myń ampýla jáne 6 myń tabletka tárkilendi. Tekserý kezinde anyqtalǵan zańbuzýshylyqtar boıynsha 135 medıtsına qyzmetkerine qatysty materıaldar jınaqtalyp, medıtsınalyq jáne farmatsevtıkalyq baqylaý komıtetiniń aýmaqtyq departamentterine joldandy. 380 myń tonna prekýrsordyń aınalymy shektelip, 70 zańdy tulǵa ákimshilik jaýapkershilikke tartyldy. 20 esirtkige qatysty quqyqbuzýshylyq anyqtaldy, — dedi ІІM esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Al Shyǵys Qazaqstan oblysynda prekýrsorlardy ımporttaý jáne eksporttaýmen aınalysatyn iri kásiporynǵa qatysty ákimshilik quqyqbuzýshylyq týraly hattama toltyrylyp, 380 myń tonna prekýrsor tárkilendi.
Aqmola oblysynda quramynda esirtki bar dárilerdi satqany úshin 2003 jyly týǵan Kókshetaý qalasynyń turǵyny ustaldy. Іshki ister mınıstrligi esirtki jáne prekýrsorlardyń zańdy aınalymymen aınalysatyn zańdy tulǵalardy baqylaýdaǵy zattardy saqtaý, tasymaldaý, paıdalaný jáne ótkizý erejelerin qatań saqtaýǵa shaqyrady. Atalǵan talaptardy buzǵany úshin ákimshilik jáne qylmystyq jaýapkershilik kózdelgen.
Eske sala keteıik, buǵan deıin Qazaqstanda dári-dármekti 100 kúnnen aspaıtyn merzimde tirkeıtin joba iske qosylǵanyn jazǵan edik.