Jalǵan polıtsııa, jalǵan bank: ІІM alaıaqtardyń jańa aılasyn áshkereledi
ASTANA. KAZINFORM — Іshki ister mınıstrligi jasandy ıntellekt tehnologııalaryn qoldaný arqyly jasalatyn ınternet-alaıaqtyqtyń jańa túrleriniń taralýy týraly eskertedi, dep habarlaıdy Polisia.kz.
Tártip saqshylarynyń sózinshe, qaskóıler ózderin quqyq qorǵaý organdarynyń qyzmetkerleri, bank sektorynyń ókilderi jáne basqa uıymdardyń mamandary retinde kórsetý úshin uqsas sýretterdi, aýdıo jáne beınematerıaldardy jasaý múmkindikterin belsendi túrde qoldanyp jatyr. Atap aıtqanda, azamattarǵa beıneqońyraýlar arqyly belgisiz tulǵalar jalǵan beıne men daýysty paıdalana otyryp, ózderin polıtsııa qyzmetkerleri, ulttyq qaýipsizdik organdary nemese bankterdiń qaýipsizdik qyzmetiniń ókilderi retinde tanystyratyn jaǵdaılar tirkelip jatyr.
Kúdikti operatsııalardy anyqtaý nemese aqshanyń syrtqa shyǵý qaýpi degen syltaýmen olar azamattardy aqshany shuǵyl túrde «qaýipsiz shottarǵa» aýdarýǵa kóndiredi. Sonymen qatar resmı habarlamalarǵa uqsas etip jalǵan habarlamalar men qujattardy jiberý, memlekettik organdar nemese qarjy uıymdary ókilderimen baılanys ornatqandaı áser qaldyratyn avtomattandyrylǵan servıster men chat-bottardy paıdalaný faktileri de kezdesedi. Іshki ister mınıstrligi quqyq qorǵaý organdary men bank qyzmetkerleri eshqashan beıneqońyraý arqyly aqsha aýdarýdy talap etpeıtinin, qupııa málimetterdi suramaıtynyn jáne telefon arqyly qarjylyq operatsııalar júrgizýdi usynbaıtynyn eskertedi.
— Alaıaqtyqtyń aldyn alý úshin beıtanys adamdardyń aqsha aýdarýǵa qatysty nusqaýlaryn oryndamańyzdar, jeke jáne bank derekterin bermeńizder, sondaı-aq kelip túsken aqparatty resmı derekkózder arqyly tekserińizder. Barlyq alaıaqtyq faktileri men áreketteri týraly dereý polıtsııaǵa habarlaý qajet, — dedi ІІM kıberqylmysqa qarsy is-qımyl departamentiniń basqarma bastyǵy Beıbit Birjanov.
Buǵan deıin Qazaqstanda ınternet-alaıaqtyqtan kelgen shyǵyn 4,8 mlrd teńgege jetkenin jazǵanbyz.
