Jalǵan polıtseıler qostanaılyq zeınetkerlerdi aldap, aqsha alyp otyrǵan
QOSTANAI. QazAqparat - Qostanaı oblysynda ózderin polıtseı retinde tanystyryp, aqsha talap etip júrgen alaıaqtar kóbeıdi,dep habarlaıdy QazAqparat oblystyq ІІD baspasóz qyzmetine silteme jasap.
Qostanaıda jyl basynan beri 5 alaıaq ózderin tártip saqshysy retinde tanystyryp, elden aqsha bopsalap kelgen. Jalǵan polıtseıler 70-90 jas aralyǵyndaǵy zeınetkerlerdi quryǵyna túsirgen.
«Olar zeınetkerlerge habarlasyp, nemereleriniń jaıaý júrginshilerdi qaǵyp ketkenin jetkizgen. Osylaısha, nemerelerin polıtsııadan alyp ketý úshin aqsha talap etken. Egde jastaǵy kisilerdiń barlyǵy aqparatty tekserý úshin týys-týǵandaryna habarlamaǵan. 4 jaǵdaıda zeınetkerler 100 myń teńgege deıin aqsha bergen. Olar jalǵan tártip saqshylaryna beretin aqshany úıleriniń aldyndaǵy poshta jáshikteri men podezderge qaldyryp otyrǵan», - delingen vedomstvonyń baspasóz habarlamasynda.
Belgili bolǵandaı, bir zeınetker alaıaqtyń «Kıvı ámııanyn» 40 000 teńgemen toltyrǵan.
Osyǵan baılanysty tártip saqshylary bógde adamdardan saq bolýdy eskertedi.
