Jalǵan nómir: Abaı oblysynda bir táýlikte 91 buzýshylyq anyqtalǵan
ASTANA. KAZINFORM — 10–14 maýsym aralyǵynda Abaı oblysynyń aýmaǵynda jol qozǵalysy qaýipsizdigin qamtamasyz etýge baǵyttalǵan «Jalǵan nómirler» respýblıkalyq jedel-profılaktıkalyq is-sharasy ótkizilip jatyr, dep habarlaıdy oblystyq PD baspasóz qyzmeti.
Jedel-profılaktıkalyq is-shara barysynda Abaı oblysy Polıtsııa departamentiniń qyzmetkerleri bir táýlik ishinde jol júrisi qaǵıdalarynyń jalpy 91 buzýshylyǵynyń jolyn kesti.
Atap aıtqanda, júrgizilgen reıdtik jáne baqylaý is-sharalary nátıjesinde kelesi derekterdiń aldy alyndy:
- Memlekettik tirkeý nómirlik belgileri oqylmaıtyn, ulttyq standart talaptaryna sáıkes kelmeıtin nemese kózdelmegen oryndarǵa ornatylǵan kólik quraldaryn basqarý faktileri — 9.
- Memlekettik tirkeý nómirlik belgilerinsiz, sondaı-aq paıdalanýǵa tyıym salynǵan nemese belgilengen tártippen tirkelmegen kólik quraldaryn basqarý — 13.
- Kólik quraldaryna ádeıi jalǵan nemese qoldan jasalǵan memlekettik tirkeý nómirlik belgilerin ornatý faktileri — 3 derek.
- Jalǵan nemese qoldan jasalǵan memlekettik tirkeý nómirlik belgilerimen kólik quraldaryn basqarý, sondaı-aq olardy sáıkestendirýge kedergi keltiretin qosymsha qurylǵylar men materıaldardy paıdalaný derekteri — 2.
— Sonymen qatar, atalǵan is-shara aıasynda jol qozǵalysyna qatysýshylar tarapynan oryn alǵan ózge de tártip buzýshylyqtar nazardan tys qalmaı, profılaktıkalyq jumystar kúsheıtildi. Polıtsııa qyzmetkerleri quqyq buzýshylyqtardyń aldyn alý maqsatynda túsindirý jumystaryn júrgizip, júrgizýshilerge jol qozǵalysy erejelerin qatań saqtaý qajettigin eskertti, — delingen vedomstvo aqparatynda.
Buǵan deıin SQO-da júk kólik júrgizýshileriniń keıbiri aıyppul tólemeý úshin jalǵan nómirmen júretinin jazǵan edik.
