Jalǵan málimetpen sýbsıdııa alǵan jambyldyq sharýalar jazalandy
QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti ótkizgen brıfıngte mal sharýashylyǵyn sýbsıdııalaý baǵytyndaǵy qyzmetine júrgizilgen sybaılas jemqorlyq táýekelderine syrtqy taldaý qorytyndylary saralandy.
Departamenttiń bas mamany Qaırat Aqmyrzaevtiń aıtýynsha, oblys ákimdiginiń aýyl sharýashylyǵy basqarmasynyń mal sharýashylyǵyn sýbsıdııalaý baǵytyndaǵy qyzmetine júrgizilgen sybaılas jemqorlyq táýekelderine syrtqy taldaý barysynda, sýbsıdııa alǵan sharýashylyq sýbektileriniń óz ótinimderinde durys emes, ıaǵnı shyndyqqa janaspaıtyn málimetterdi kórsetkendigi anyqtalǵan.
«Birqatar sharýalar sýbsıdııa alý barysynda quzyrly mekemelerge jalǵan málimetter ótkizgen bolyp shyqqan. Nátıjesinde óńir sharýa qojalyqtary 975 200 teńge kólemindegi sýbsıdııaǵa tólengen qarajatty bıýdjetke keri qaıtardy. Bul baǵytta jumys júrgizile bermek»,- deıdi Qaırat Aqmyrzaev.
Aıta keteıik, jalǵan qujatpen qarjy jymqyrýdy oılaǵandardyń qatarynda «Merki asyl tuqymdy zaýyty», «Birlik», «Gambýrg», «Aq-bars» jáne «Aıala» sharýa qojalyqtary men seriktestikteri bar.
«Búgingi tańda oryn alǵan sybaılas jemqorlyq táýekelderin joıý maqsatynda asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdasynyń jańa jobasy ázirlendi. Oǵan sýbsıdııalaýdyń aqparattyq júıesin, aýyl sharýashylyǵy janýarlaryn birdeılendirý bazasymen ıntegratsııalaı otyryp, avtomatty túrde salystyryp tekserýdi júzege asyrý talaptary qosyldy», - dep atap ótti Aýyl sharýashylyǵy basqarma basshysynyń orynbasary Erkebulan Kúlkeev.