Jalǵan qujatpen antıkor qyzmetkerimin dep tanystyrǵan azamat halyqtan keshirim surady
«Men Nurbol Karımov, Talǵar aýdanynyń turǵyny barsha qazaqstandyqtardan ózge tanymal tulǵalardyń atyn jamylyp, sybaılas jemqorlyqqa qarsy qyzmettiń ókilimin degenim úshin keshirim suraımyn. Óz kinámdy moıyndaımyn jáne bolǵan jaıtqa qatty ókinemin»,- deıdi beınejazba arqyly keshirim suraǵan azamat.
Sybaılas jemqorlyqqa qarsy is-qımyl agenttiginiń baspasóz qyzmeti bul azamattyń esh ýaqytta agenttikte istemegenin jáne oǵan qatysty qylmystyq is qozǵalǵanyn málimdegen bolatyn.
«Áleýmettik jelilerde QR Sybaılas jemqorlyqqa qarsy is-qımyl agenttiginiń jalǵan qyzmetkerimen taralyp jatqan vıdeo faktisi boıynsha kelesini habarlaımyz. Atalǵan azamat eshqashan Antıkor qyzmetkeri bolǵan emes jáne qazir de qyzmet atqarmaıdy. Aǵymdaǵy jyldyń 2 maýsymynda Shymkent qalasynda bul azamattyń kim ekeni anyqtaldy. Qazirgi ýaqytta oǵan qatysty Qylmystyq kodekstiń 385-babynyń 3-bóligi (qujattardy qoldan jasaý) boıynsha qylmystyq is qozǵaldy» delingen vedomstvonyń habarlamasynda.
Aıta keteıik, buǵan deıin áleýmettik jelide jol patrýl polıtsııa qyzmetkerlerine ózin antıkor qyzmetkerimen dep tanystyrǵan azamattyń vıdeosy jarııalanǵan bolatyn.
Artynsha qujattyń jalǵan ekeni anyqtaldy. Biraq jalǵan qujatty jas jigittiń qaıdan alǵany belgisiz.