Jalǵan qujatpen 251 mln teńge alǵan: Almaty oblysynda agrosýbsıdııa daýy boıynsha úkim shyqty
ASTANA. KAZINFORM - Almaty oblysynda sýbsıdııalardy jymqyrý jáne jalǵan shot-faktýralar jazyp berý faktileri boıynsha sot úkimi shyǵaryldy. Tergep-tekserýdi Qarjylyq monıtorıng agenttiginiń Almaty oblysy boıynsha departamenti júrgizdi, dep habarlaıdy agenttiktiń baspasóz qyzmeti.
Іs materıaldaryna sáıkes, «BAǴDAÝLET ı PK» AÓK jáne «AMANTAÝ-2023» AÓK basshysy eki jyl boıy agroónerkásiptik keshendi qoldaýǵa arnalǵan memlekettik baǵdarlamalar aıasynda sýbsıdııalardy zańsyz alyp otyrǵan.
Aýyl sharýashylyǵy basqarmasyna shıki sút satyp alý, sondaı-aq sary maı men qatty irimshik óndirý jáne ótkizý týraly jalǵan málimetter usynylǵan. Jalǵan qujattardyń negizinde bıýdjetten 251 mln teńgeden astam sýbsıdııa zańsyz tólengen.
Alaıda kooperatıvterde kórsetilgen qyzmetti júzege asyrý úshin qajetti óndiristik qýattar, jabdyqtar, jumysshylar jáne ózge de resýrstar bolmaǵan. Sonymen qatar tergeý barysynda jalǵan mámilelerdi rásimdeý jáne kontragentterdiń salyq júktemesin jasandy túrde tómendetý maqsatynda paıdalanylǵan «ComputerService» JK arqyly jalǵan elektrondyq shot-faktýralar jazyp berý shemasy anyqtaldy.
Nátıjesinde bıýdjetke tólenbegen salyq somasy 416 mln teńgeden asty. Sot qylmystyq shemaǵa qatysqan eki adamdy 6 jylǵa deıin bas bostandyǵynan aıyrý jazasyna kesti. Sondaı-aq qylmystyq jolmen alynǵan qarajatqa satyp alynǵan «BMW» avtokóligi memleket kirisine tárkilendi. Úkim zańdy kúshine engen joq.
Aıta keteıik, Túrkistan oblysynda sýbsıdııaǵa baılanysty 1000-nan astam is qaralyp jatyr.
