Jalǵan qujat jasaǵan sharýa qojalyǵynyń basshysy sottaldy – Qostanaı
QOSTANAI. QazAqparat – Qostanaı oblysynda jalǵan qarjy qujattaryn rásimdegen sharýa qojalyǵynyń basshysy sottaldy, dep habarlaıdy QazAqparat QR QM Qarjy monıtorıngi komıtetiniń baspasóz qyzmetine siltep.
2020 jyldyń aqpan aıynda oblystyq Ekonomıkalyq tergeý departamentiniń qyzmetkerleri tergeý áreketterin júrgizý barysynda «Maqsat» sharýa qojalyǵynda jalǵan býhgalterlik qujattar rásimdelgenin anyqtaǵan.
«Sharýa qojalyǵynyń basshysy óziniń atynan 3-synypty bıdaı men zyǵyr jetkizgeni úshin «Altyn Arna 2015» JShS-ne 679 250 000 teńge somasyna jalǵan shot-faktýralar jazyp otyrǵan. Nátıjesinde 3 625 000 teńge somasyna paıyzdyq syıaqyǵa ıe bolǵan. Alaıda, taýarlar naqty jerge jetkizilmegen. Tekserý barysynda «Maqsat» ShQ basshysynan bastapqy býhgalterlik qujattar, aqsha qarajaty jáne basqa da zattar tárkilendi», - delingen baspasóz habarlamasynda.
Qostanaı qalasynyń №2 sotynyń úkimimen «Maqsat» ShQ basshysy QR QK 24-babynyń 3-bóligi, 216-babynyń 3-bóligi boıynsha sottaldy. Atalǵan qylmysty jasaǵany úshin oǵan shartty túrde 2 jyl 6 aıǵa bas bostandyǵynan aıyrý jazasy taǵaıyndaldy.
Úkim zańdy kúshine endi.
