Kóshi-qon zańnamasyn buzýdyń 7 myńnan astam deregine tosqaýyl qoıyldy

ASTANA. KAZINFORM —  ІІM kóshi-qon qyzmeti komıteti aýmaqtyq polıtsııa bólinisterimen birlesip, respýblıka boıynsha aýqymdy jedel-aldyn alý is-sharasyn ótkizdi. Bul týraly Polisia.kz jazdy.

 Elimizde bes kún ishinde 7 myńnan astam kóshi-qon zańnamasyn buzý faktileriniń joly kesildi: 

— 2,5 myńnan astam sheteldik Qazaqstan Respýblıkasynyń aýmaǵynda bolý merzimderin buzǵan.

— 862 sheteldik tıisti ruqsatsyz jumys istegen.

 — 499 qazaqstandyq jumys berýshi zańsyz sheteldik jumys kúshin tartqan.

 — 3 myńnan astam qabyldaýshy tulǵa ishki ister organdaryna sheteldik azamattardyń ózderinde turatyny týraly habarlamaǵan.

Barlyq quqyq buzýshy jaýapqa tartyldy. Sonymen qatar 678 sheteldik azamat elden shyǵaryldy, endi olarǵa Qazaqstanǵa kirýge bes jylǵa tyıym salynady.

Alǵash ret Mysyr azamattarynyń zańsyz eńbek qyzmeti faktisi tirkeldi. Qaraǵandyda iri qurylys alańynda ruqsatsyz jumys istegen osy eldiń 14 azamaty tabyldy.

Almaty oblysynyń Jambyl aýdanynda kóshi-qon qyzmetiniń qyzmetkerleri zańsyz alkogol óndirýmen aınalysqan 12 QHR azamatyn anyqtady. Olardyń da tıisti ruqsat qujattary bolmaǵan.

— Zańdy udaıy buzatyn jumys berýshiler de nazardan tys qalmady. Qaraǵandy oblysynda sheteldikterdi zańsyz jumysqa birneshe ret tartýdyń úsh jaǵdaıy anyqtaldy. Osy epızodtar boıynsha QR Qylmystyq kodeksiniń 395-babymen qylmystyq is qozǵaldy, sotqa deıingi tergeý júrgizilip jatyr, — delingen habarlamada.

Almaty oblysynda polıtsııa qyzmetkerleri HQKO-nyń úsh qyzmetkeri uıymdastyrǵan zańsyz kóshi-qon arnasyn anyqtady. Olar jeke basynyń paıdasy úshin zańdy buza otyryp, eńbek mıgranttaryn zańdastyrý úshin jalǵan qujattar jasaǵan. QR QK 394-baby boıynsha qylmystyq is qozǵaldy.

Eske sala keteıik, Qazaqstanda zańsyz kóshi-qonǵa qarsy kúres aıasynda 10 maýsymnan keıin Qyrǵyzstanda barlyq quqyq qorǵaý organdarynyń qatysýymen «Nelegal» operatsııasy bastalady. Osyǵan baılanysty sheteldikterge eldegi mártebesin zańdastyrý nemese elden shyǵý usynyldy.