Jalǵan kompanııaǵa 20 mln teńge salǵan elordalyq aqshasy men páterinen aıyryldy

ASTANA. QazAqparat – Ótken jyly 1 750 qazaqstandyq alaıaqtarǵa aldanyp, jalǵan ınvestıtsııalyq kompanııalarǵa aqsha salǵan. Bul týraly Іshki ister mınıstrliginiń brıfıngisinde Krımınaldyq polıtsııa departamenti bastyǵynyń orynbasary Arman Orazalıev aıtty, dep habarlaıdy QazAqparat tilshisi.

«Búgingi tańda áleýmettik jelilerde, jalpy ǵalamtor jelisinde ulttyq kompanııalardyń atynan ınvestıtsııa salymdary týraly habarlandyrýlar taralýda. Sonymen qatar, azamattar osy alaıaqtyq ınvestıtsııalarǵa aqshalaryn kóbeıtý úshin nesıeler rásimdegen. Jeńil aqshany izdegender jınaqtarynan aıyryldy. Mysaly, 16 qańtarda elorda turǵyny polıtsııaǵa júgindi. Ol jumys istemeıtin ınvestıtsııalyq kompanııaǵa 20 mln teńge salyp, óz aqshasynan jáne páterinen aıyrylyp qalǵan», - dep málim etti Arman Orazalıev.

Polıtsııa ókili ınvestıtsııalyq salym jasaý týraly sheshim qabyldamas buryn, ınternette ornalasqan kompanııalardyń resmı ókilderine habarlasý qajet ekenin atap ótti.

«Qazaqstanda bırja salasynda lıtsenzııasy bar brokerler men dılerler arqyly ǵana saýda jasaý qajet. Atalǵan ınvestıtsııalyq qyzmetin QR Qarjy naryǵyn retteý jáne damytý agenttiginiń atynan ýákiletti organ retteıdi. Brokerlik nemese dılerlik qyzmetti júzege asyratyn uıymdardyń lıtsenzııasynyń bolýyn resmı GOV.KZ saıty arqyly tekserýge bolady. Qazirgi tańda Qazaqstanda 38 brokerlermen qyzmet kórsetýde. Sondyqtan kez kelgen saıttarda shyǵatyn jarnama siltemelerge kirip derbes derekterdi engizýge bolmaıdy», - dep eskertti Arman Orazalıev.

Qosa keteıik, byltyr elimizde 20 myńnan asa ınternet-alaıaqtyq qylmysy tirkelgen.