Jalǵan kompanııa arqyly aqsha jymqyryp, jıhaz tsehyn ashqan — prokýror Boqaevtyń alaıaqtyq tásilin aıtyp berdi

Oǵan alaıaqtyq, qylmystyq jolmen alynǵan kiristerdi zańdastyrý, urlyq, aǵashtardy zańsyz kesý jáne jalǵan aqparat taratý sııaqty birqatar qylmystyq áreket boıynsha aıyp taǵylyp otyr. Qylmystyq istiń bir epızodynda qarajatty jymqyrý jáne zańdastyrý tásilin qalaı júzege asyrylǵany baıandalady. Prokýrordyń aıtýynsha, bul aıla-sharǵyny Boqaevtyń ózi oılastyryp, uıymdastyrǵan.

«QazTransGaz» basshysynyń keńesshisi bolyp júrgende Boqaev kompanııanyń kásipodaǵy arqyly qarajat shyǵarýdyń ońtaıly jolyn tapqan. Óıtkeni kásipodaqqa memlekettik satyp alý týraly zańnamanyń talaptary qoldanylmaǵan. Demek, kásipodaq merekelik jáne ózge de is-sharalarǵa konkýrstar men tenderler ótkizbeı-aq qarajat jumsaı alǵan.

Osy múmkindikti paıdalanǵan Boqaev kásipodaqqa is júzinde ózine tıesili «BM Trust» JShS-imen jumys isteýdi usynǵan. Kúdik týǵyzbaý úshin kompanııany aldyn ala óziniń týysy Madııar Qalmenovtiń atyna rásimdegen. Qalmenov te bul qylmysqa qatysqan dep aıyptalyp otyr.

Alǵashynda Boqaev ózin senimdi seriktes retinde kórsetýge tyrysty. Ol Jańa jyl merekesi men sporttyq jarystardy qosa alǵanda, birneshe korporatıvtik is-shara uıymdastyrǵan. Osy ýaqytta kásipodaq basshylyǵy shyǵyndardy múlde teksermeıtinin baıqaǵan. Olar Boqaev usynǵan barlyq shyǵyn smetasyna esh tekserýsiz qol qoıa bergen. Bul jaǵdaı onyń ári qaraı esh kedergisiz áreket etýine jol ashqan.

Qarajatty jymqyrý 2018 jyldyń kúzinde, Batys Qytaıdan Batys Eýropaǵa deıin gazben júretin avtokólikterdiń iri halyqaralyq avtosherýin ótkizý josparlanǵan kezde júzege asyrylǵan. Boqaev is-sharanyń qunyn ádeıi 86,8 mıllıon teńgege deıin kóterip, eki kelisimshart jasaý arqyly qarajat shyǵarý tásilin qoldanǵan.

— Avtosherýdi naqty uıymdastyrý jáne qajetti jumystardy atqarý úshin «We Can» JShS jaldanyp, oǵan 38,9 mıllıon teńge tólengen. Alaıda dál sol ýaqytta kásipodaq Boqaevtyń baqylaýyndaǵy «BM Trust» kompanııasymen 47,9 mıllıon teńgege ekinshi kelisimshart jasasqan. Bul kompanııa is júzinde eshqandaı jumys atqarmaı, qarajatty negizsiz alǵan. Daıyndyq jumystary júrip jatqanda Boqaev qyzmettik jaǵdaıyn paıdalanyp, is-sharanyń naqty oryndaýshysy «We Can» JShS-in qarajattyń bir bóligin ózi kórsetken adamdardyń esepshottaryna aýdarýǵa májbúrlegen. Aqsha belgili bir qyzmetter úshin tólem retinde rásimdelgen. Qarajattyń bir bóligi Boqaevtyń anasynyń atyna tirkelgen «Kun-Arai» kompanııasynyń esepshotyna, al taǵy bir bóligi tikeleı Qalmenovke aýdarylǵan, — delingen habarlamada.

Sodan keıin «BM Trust» arqyly jymqyrǵan qarajatty zańdastyrý qajet bolǵan. Osy maqsatta Boqaev aqshany óziniń jeke bıznesin, ıaǵnı jıhaz óndirisin damytýǵa jumsaǵan. Aıyptaý tarapynyń málimetine sáıkes, jymqyrylǵan qarajat esebinen Astanadaǵy óndiristik tsehtar men keńselerdiń jaldaý aqysy tólenip, stanoktar men kompıýterler satyp alynǵan. Sondaı-aq býhgalterlerdiń qyzmetine, kúzet pen jarnamaǵa qarjy jumsalǵan. Barlyǵy osyndaı 19 bank operatsııasy júzege asyryldy. Qalmenov shamamen 10 mıllıon teńgeni qolma-qol aqshaǵa aınaldyrǵan. Aıyptalýshylar bul qarajatty jeke qajettilikterine, sonyń ishinde áýe bıletteri men qonaqúılerdiń aqysyn tóleýge paıdalanǵan.

Memlekettik aıyptaýshynyń málimdeýinshe, nátıjesinde sottalýshylar jalǵan qujattar men qyzmettik jaǵdaıyn paıdalaný arqyly kásipodaqtyń 42 mıllıon teńgeden astam qarajatyn jymqyrǵan.

Eske sala keteıik, Sanjar Boqaev bıyl naýryzda ustalyp, birqatar qylmys jasady degen kúdikke ilindi. Oǵan qatysty qylmystyq is Qylmystyq kodekstiń 190, 188, 218, 340 jáne 274-baptary boıynsha qaralyp jatyr.

Budan buryn Sanjar Boqaevtyń soty kezinde sýdıa qatysýshylar men BAQ ókilderine eskertý jasady.