Jalǵan kásiporyn quryp, aqsha jasaý áreketteri tyıylar emes - qarjy polıtsııasy
ASTANA. Qarashanyń 11-i. QazAqparat /Aıdar Ospanalıev/ - Memleketke tólenetin salyqtardyń ýaqytynda oryndalmaýyna jalǵan kásipkerlik qyzmeti de orasan zor nuqsan keltirip otyr.
Bul másele jóninde búgin jýrnalıstermen bolǵan aptalyq brıfıngte Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti, dep habarlaıdy QazAqparat.
Resmı ókildiń aıtýynsha, elimizde zańsyz jolmen alynǵan dúnıelerdi qolma-qol aqshaǵa aýystyratyn fırmalar sany azaıar emes. Olardyń kópshiliginiń osyndaı áreketteriniń sońy qıyn jaǵdaılarǵa dýshar etip otyr. Mysaly, Aqtóbe oblysynda B.Ótegenov atty azamat «Dogýs» jalǵan jaýapkershiligi shekteýli seriktestigin quryp, kommertsııalyq uıymdardyń qarjylaryn qolma-qol aqshaǵa aınaldyrýmen shuǵyldanyp kelgen. Osy áreketi arqyly ol memleketke tólenýi tıis 1 mıllıard 300 mıllıon teńgeniń qoldy bolýyna yqpal etken. Jemqor 4 jylǵa bas bostandyǵynan aıyryldy. «Osy oblysta A.Polchak atty azamat birneshe adamnyń atynan birneshe jalǵan kásiporyn quryp, olardyń esepshottary arqyly kommertsııalyq uıymdardyń qarjylaryn qolma-qol aqshaǵa aınaldyratyn bolǵan. Sońynda memleketke tólenýi tıis 1 mıllıard 817 mıllıon teńge qoldy bolyp, ol 3 jyl abaqtyda otyratyn bolyp sheshildi. Al Almatyda qatarynan 20 jalǵan kásiporyn qurǵan alaıaq memleketti 1 mıllıardtan astam teńgege shyǵynǵa otyrǵyzyp, 3 jylǵa sottaldy», dedi M.Jumanbaı.
