Jalǵan ınvestıtsııaǵa aldanǵan aqmolalyq muǵalim 7,5 mln teńgesinen aıyryldy
ASTANA. KAZINFORM – Aqmola oblysynda 65 jastaǵy muǵalim ınternet-alaıaqtardyń qurbany bolyp, jalǵan ınvestıtsııalyq platformaǵa 7,5 mln teńge joǵaltty, dep habarlaıdy Kazinform tilshisi.
Aqmola oblysy polıtsııa departamentiniń málimetinshe, er adam ótken jyldyń shilde aıynda ózin ınvestıtsııalyq kompanııa retinde tanystyrǵan ınternet-platformaǵa tirkelgen. Osydan keıin onymen «qarjy keńesshileri» baılanysqa shyǵyp, turaqty tabys pen ınvestıtsııanyń jyldam ósetinin aıtyp, aqsha salýǵa kóndirgen.
Jábirlenýshi birneshe aı boıy alaıaqtar kórsetken esepshottarǵa turaqty túrde aqsha aýdaryp otyrǵan. Jeke jınaǵy taýsylǵan soń, tanystary men áriptesterinen qaryz alyp, qarajat salýdy jalǵastyrǵan. Nátıjesinde ol alaıaqtarǵa jalpy 7,5 mln teńge aýdarǵan.
Keıin aqshany keri qaıtarý múmkin bolmaı, «ınvestıtsııalyq kompanııa» ókilderi baılanysqa shyǵýdy toqtatqan kezde ǵana onyń alaıaqtyq shemanyń qurbany bolǵany belgili bolǵan. Osydan keıin er adam polıtsııaǵa aryzdanǵan.
Atalǵan derek boıynsha sotqa deıingi tergeý bastaldy. Quqyq qorǵaý organdary qylmysqa qatysy bar adamdardy anyqtaý úshin jedel-izdestirý sharalaryn júrgizip jatyr.
Polıtsııa ınternet-alaıaqtar shynaıy ınvestıtsııalyq platformalarǵa óte uqsas saıttar jasap, jalǵan lıtsenzııalar men qoldan jasalǵan tabys kórsetkishterin paıdalanatynyn eskertti. Sonymen qatar olar jábirlenýshilermen únemi baılanysta bolyp, ınvestıtsııanyń tabysty ekenin kórsetip, kóbirek qarjy salýǵa ıtermeleıdi.
Osyǵan baılanysty tártip saqshylary azamattardy ınternet arqyly tez ári ońaı tabys tabýǵa ýáde beretin usynystarǵa syn kózben qaraýǵa shaqyrdy.
Eske sala ketsek, Almaty oblysynda ınternet-alaıaqtyqqa qatysty 518 jalǵan habarlandyrý buǵattaldy.
