Jalǵan hattamalar jasaǵan polıtsııa qyzmetkerine 1,5 mln teńge aıyppul salyndy
ASTANA. QazAqparat - Óskemen qalasynyń № 2 soty dáleldemelerdi jáne jedel-izdestirý materıaldaryn burmalap, laýazymdy ókilettilikterin teris paıdalandy dep aıyptalǵan T.-ǵa qatysty qylmystyq isti qarady.
Sotta T.-nyń ShQO ІІD patrýldik jol polıtsııasynyń batalon polıtsııasy laýazymynda qyzmet atqaryp júrip, Ákimshilik polıtsııa basqarmasy ǵımaratynyń mańynda óziniń tanysyna qaryz retinde reseılik 36 myń rýbl mólsherinde aqsha qarajatyn bergendigi anyqtaldy.
Boryshker K. oǵan qaryzdy ýaqytynda qaıtarmaǵan, soǵan baılanysty T. ÁQBtK-niń 591-babynyń birinshi bóliginde kózdelgen (kólik quralyn basqarý kezinde júrgizýshiniń telefondy ne radıostantsııany paıdalanýy) ákimshilik quqyq buzýshylyq jasady dep azamat K.-ǵa jalǵan hattama toltyryp, oǵan ózi qol qoıǵan.
Osyǵan uqsas taǵy 5 jalǵan hattama jasap, kúdik týǵyzbas jáne buzýshylyq qaıtalanbas úshin olardy árbir aýdandarǵa baǵyttap jibergen. Osy kórsetilgen hattamalar negizinde K. ákimshilik jaýapqa zańsyz tartylyp, onyń konstıtýtsııalyq quqyqtary buzylǵan.
Sot T.-ny Qylmystyq kodekstiń 361-babynyń ekinshi bóliginde, 416-babynyń ekinshi bóliginde qarastyrylǵan qylmystardy jasaǵany úshin kináli dep tanydy. Onyń múlkin tárkileýsiz, memlekettik qyzmette laýazymdardy atqarý quqyǵynan ómir boıyna aıyrýmen qatar, 850 AEK mólsherinde 1 684 700 teńge somasynda aıyppul salýǵa úkim etti.
Úkim zańdy kúshine engen joq.
