Jalǵan hattama toltyrýdy ádetke aınaldyrǵan aqtóbelik polıtsıeılerge planshet satyp alynady
AQTÓBE. QazAqparat -Aqtóbe oblystyq jergilikti polıtsııa qyzmeti 100 planshet satyp alady. Sebebi, polıtsııa qyzmetkerleri jalǵan ákimshilik hattama toltyrýdy ádetke aınaldyrǵan, dep habarlaıdy QazAqparat tilshisi.
Aqtóbe oblystyq prokýratýrasy Jergilikti polıtsııa qyzmetin tekserip, jalǵan ákimshilik hattama toltyrý derekterin anyqtady. Tipti ózge óńirde turatyn adamdar negizsiz ákimshilik jaýapkershilikke tartylǵan. Prokýrorlar tekserý júrgizgen soń polıtsııa qyzmetkerlerine qatysty birneshe qylmystyq is qozǵaldy.
«Sybaılas jemqorlyqqa qarsy Ulttyq bıýrosynyń oblystyq departamenti qylmystyq isti tergeý barysynda jalǵan hattamalardyń jasalǵanyn anyqtady. Qazirgi kúni ondaǵan jalǵan hattama jasalǵany belgili bolyp otyr. Osy derekke qatysty ákimshilik óndiristik qujattardy elektrondy formatqa aýystyrý jumysy júrip jatyr. Aqtóbe oblystyq prokýratýrasynyń usynysymen jergilikti ákimdik Jergilikti polıtsııa qyzmetine 100 planshet satyp alady. Bıýdjetten 13,7 mıllıon teńge bólindi. Endi hattamalardyń barlyǵy elektrondy túrde toltyrylady»,- dep habarlady Aqtóbe oblystyq prokýratýranyń baspasóz qyzmeti.
