Jalǵan habarlama taratyp, sottalǵandardyń 55%-y mas bolǵan – statıstıka

ASTANA. QazAqparat – Eldi dúrliktirip, «ǵımartta bomba bar» degen sııaqty jalǵan habarlama taratatyndar kóbine mundaı áreketti mas kúıinde jasaıdy. Bul týraly ІІM ekstremızmge qarsy is qımyl departamenti 1 basqarmasy bastyǵynyń orynbasary Almas Talqanbaev málim etti, dep habarlaıdy QazAqparat tilshisi.

«Statıstıkaǵa sáıkes, jalǵan habarlama taratyp, sottalǵandardyń 48-55 paıyzy qylmys jasaǵan sátte qatty mas bolǵan. Jalǵan habarlama taratatyndardyń áleýmettik portretine keler bolsaq, 88%-y jumyssyzdar, tek 9%-y ǵana jumys isteıdi, al 1,7%-y – oqýshy. «Ázilqoılardyń» ortasha jasy – 30-49 aralyǵynda», - dedi Almas Talqanbaev mınıstrlikte ótken baspasóz máslıhatynda.

Onyń aıtýynsha, jastardyń arasynda jalǵan habar taratýǵa qumarlar bar.

«Olardyń 85%-ǵa jýyǵy mobıldi telefon arqyly habarlanǵan. Aqparattyq tehnologııanyń damýyna baılanysty ınternet arqyly da kelip túsken habarlamalar bar. Ondaı fakti 8% shamasynda. Jalǵan habarlama taratýshylar adamdar kóp jınalatyn oryndar (saýda ortalyqtary, bazar, dúken), memlekettik organdar men bilim berý mekemeleriniń ákimshilik ǵımarattary jáne vokzzal men áýejaıdy tańdaıdy», - deıdi ol.

Buǵan deıin habarlaǵanymyzdaı, ótken aptada elimizde 2,6 myńnan astam qylmys jasalǵan. Onyń ishinde 4 kisi ólimi jáne 3 qasaqana densaýlyqqa zııan keltirý faktisi tirkeldi.