Jalǵan habarlama: Aqtóbe mektepterinen jarylǵysh zat tabylmady
AQTÓBE. QazAqparat – Aqtóbe polıtsııasy «mektepterde bomba bar» degen habarlamadan soń tekserý júrgizip, onyń jalǵan ekendigin aıtty, dep habarlaıdy QazAqparat tilshisi.
«2-qyrkúıek kúni saǵat 07:20 shamasynda Aqtóbe qalasyndaǵy №1, 2, 21, 22 jáne 56 orta mektepteriniń elektrondy poshtasyna «ǵımaratqa bomba qoıylǵany» týraly habarlama kelip tústi. Barlyq shuǵyl qyzmetter men saperlar toby dereý oqıǵa ornyna shyqty. Ǵımarattardy tekserdi. Oqý oryndarynda oqýshylar bolǵan joq. Jarylǵysh qurylǵylar tabylǵan joq. Polıtsııa departamenti anonımdi habarlamalardyń avtoryn anyqtaýǵa jáne ustaýǵa baǵyttalǵan jedel is-sharalar júrgizip jatyr. Atalǵan derek boıynsha Qylmystyq kodekstiń «Terrorızm aktisi týraly kórineý jalǵan habarlaý» baby boıynsha sotqa deıingi tergeý bastaldy. Osy baptyń sanktsııasy bes jylǵa deıingi merzimge bas bostandyǵynan aıyrý túrindegi jazany kózdeıdi», - dep habarlady oblystyq PD baspasóz qyzmetiniń jetekshisi Erbolat Sarqulov.
Oblystyq bilim basqarmasynyń basshysy Joldas Batyrhannyń aıtýynsha, mektep poshtasyna túsken habarlama keshegi habarlamanyń dál kóshirmesi. Onda 6 mektepke jarylǵysh zat qoıylǵany týraly jazylǵan. Mektep ákimshiligi dereý polıtsııaǵa habarlap, bir saǵat boıy tekserý júrgizildi. Keıin sabaq kestege sáıkes jalǵasty.
