Jalǵan dúkeniniń ishinen zańsyz oıyn bıznesin ashqan kásipker 200 saǵattyq qoǵamdyq jumystarǵa tartyldy
ASTANA. 17 mamyr. QazAqparat - Aqtóbede kásipker dúken ashamyn dep jalǵa alǵan oryndy oıyn bıznesine aınaldyrǵan.
Bul týraly búgin Joǵarǵy Sottyń resmı ókili Oksana Peters málim etti.
«Pysyqaı» kásipker óziniń jalǵan «dúkeniniń» ishinen oıyn apparattaryn jáne elektrondy rýletka ornatqan.
«Aǵymdaǵy jyldyń aqpanynda jedel izdestirý sharalarynyń nátıjesinde onyń zańsyz qyzmeti áshkerelendi. Aqtóbe qalasy №2 sotynyń úkimimen kásipker kináli dep tanylyp, oǵan jaza retinde 200 saǵatqa qoǵamdyq jumystarǵa tartylý belgilengen. Úkim zańdy kúshine endi», - dedi resmı ókil.
Eske sala keteıik, Qazaqstan zańnamasyna sáıkes, elimizde arnaıy belgilengen aımaqtan ózge jerlerde resmı túrde oıyn avtomattary zaldary men kazınolar jabylǵan. Atalǵan oıyn bıznesi tek Almaty oblysynyń Qapshaǵaı qalasy men Aqmola oblysynyń Shýchınsk aýdany aýmaǵynda ǵana uıymdastyrylýy tıis.
Osy bap zańdy kúshine engennen bastap, elimizde 24 tulǵa sottaldy, onyń ishinde 1 tulǵaǵa aıyppul salynǵan, 1 tulǵa-shartty túrde jazalandy, al 22 tulǵa qoǵamdyq jumystarǵa tartylǵan.
