Jalǵan dollar ustaǵan mańǵystaýlyq sottaldy

MAŃǴYSTAÝ OBLYSY. QazAqparat – Mańǵystaý aýylynyń turǵyny jalǵan dollardy ótkizgeni úshin 5 jylǵa bas bostandyǵynan aıyryldy. Bul týraly QazAqparat tilshisi Qarjy monıtorıngi komıtetine silteme jasap habarlaıdy.

QR QM Qarjy monıtorıngi komıtetiniń Mańǵystaý oblysy boıynsha Ekonomıkalyq tergeý departamentiniń qyzmetkerleri Mańǵystaý aýylynyń turǵynyna qatysty jalǵan qarajatty saqtaý jáne ótkizý faktisi boıynsha qylmystyq iske tergeý júrgizdi.

«Tergeý barysynda aıyptalýshynyń 2020 jyldyń basynan tabylǵan 1500 AQSh dollarynyń jalǵan ekendigin bile otyra, onyń 1000 AQSh dollary somasynda tanystaryna qaryzyn ótegendigi anyqtaldy. Qalǵan 500 AQSh dollaryn Munaıly aýdanynyń, Mańǵystaý a. ornalasqan «Halyq Bank» aıyrbastaý kassasynda aıyrbastamaq bolyp, sol ýaqytta ustaldy.

Mańǵystaý oblysynyń Munaıly aýdandyq sotynyń úkimimen aýyl turǵyny QR QK 231-b. 2-b. 2-t. Qarastyrylǵan qylmystyq quqyq buzýshylyqty jasaǵany úshin aıypty bolyp tanylyp, 5 jyl bas bostandyǵynan aıyrý jazasyna tartyldy», - dedi baspasóz qyzmeti.