Jalǵan dıplommen jumys jasap kelgen
ASTANA. QazAqparat - Qurmanǵazy aýdandyq sotynyń úkimimen D. Rahmetov Qazaqstan Respýblıkasy Qylmystyq Kodeksiniń 385-babynyń 3-bóligimen (kórineý jalǵan qujatty paıdalaný) kináli dep tanylyp, oǵan osy bappen aıyppul jazasy taǵaıyndaldy.
Sotta anyqtalǵandaı, D. Rahmetov 2003 jylǵy 27 shildede Atyraý qalasynyń temirjol vokzalynda Álibek esimdi tanysynan 95 myń teńgege Q.Sátbaev atyndaǵy Qazaq ulttyq tehnıkalyq ýnıversıtetiniń «munaı jáne gaz uńǵymalaryn burǵylaý» fakýltetiniń syrttaı bólimin bitirip, taý-ken ınjeneri mamandyǵyn alǵandyǵy týraly dıplomyn satyp alǵan. Dıplomnyń jalǵan ekendigin bile tura, ony «Tóbearal oıl» JShS-ne tapsyryp, 2015 jylǵy 18 mamyrda 3 aı synaq merzimimen tehnolog retinde jumysqa ornalasady.
Sotta D. Rahmetov jalǵan dıplommen jumys jasaǵanyn moıyndap, óziniń otbasynda jalǵyz asyraýshy ekendigin eskerip, jeńil jaza berýdi surady.
Sot sottalýshynyń jaýabyna, dáleldemelerge baǵa berip, D.Rahmetovti QK-niń 385-babynyń 3-bóligimen kináli dep tanyp, onyń ókinýin, buryn sottalmaǵandyǵyn, otbasylyq jaǵdaıyn eskerip, oǵan 49 550 teńge mólsherinde aıyppul jazasyn taǵaıyndady.
Sot úkimi zańdy kúshine engen joq.
