Jalǵan dıplommen kúres: JOO-lar túlekterdiń 4 mln-nan astam deregin tsıfrlandyrdy
ASTANA. KAZINFORM – Elimizde birneshe jyl buryn Joǵary bilim berýdiń biryńǵaı platformasy iske qosyldy. Osy platformaǵa joǵary bilim jónindegi dıplomdar qalaı engiziledi? Bul suraqqa Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jaýap berdi.
- Dıplomdardyń zańsyz aınalymyn boldyrmaý úshin Mınıstrlik dıplomdardyń bazasyn qurdy. 2021 jylǵa deıin joǵary oqý oryndarynyń barlyǵy memlekettik úlgidegi dıplomdardy bergen. 2021 jyldan bastap «Bilim týraly» QR Zańyna sáıkes azamattyq emes jáne medıtsınalyq joǵary oqý oryndaryn qospaǵanda, joǵary oqý oryndary ózindik úlgidegi dıplomdardy beredi. Mınıstrlik ózindik úlgidegi dıplomdardyń mazmunyna qoıylatyn negizgi talaptardy, sondaı-aq serııasyn bekitedi. Ózindik úlgidegi dıplomdardyń nómirleri men QR kodtaryn generatsııalaý arnaıy Modýl arqyly júzege asyrylady. Qoljetimdilik tek jaýapty retinde taǵaıyndalǵan jáne osy modýlde tirkelgen joǵary oqý oryndarynyń qyzmetkerlerine ǵana beriledi. Generatsııa «Joǵary bilim berýdiń biryńǵaı platformasy» aqparattyq júıesi stýdent týraly málimetter negizinde júzege asyrylady, - delingen vedomstvo aqparatynda.
Aqparattyq júıede stýdent týraly málimet bolmaǵan jaǵdaıda, dıplom nómirin generatsııalaý múmkin emes. Generatsııalanǵan nómiri men QR kody joq dıplomdar jaramsyz bolyp sanalady.
- 2018 jyldan bastap joǵary oqý oryndary 1991 jyldan beri berilgen dıplomdardy tsıfrlandyrý boıynsha jumysty iske asyryp jatyr. Búginde joǵary oqý oryndary túlekterdiń 4 mıllıonnan astam tarıhı derekterin tsıfrlandyrdy. Qazir kez kelgen jumys berýshi aqparattyq júıede «Bilim týraly qujattardy tekserý» arnaıy Modýlinde ózindik úlgidegi dıplomnyń túpnusqalyǵyn, sondaı-aq memlekettik úlgidegi tsıfrlanǵan dıplomdardy tekserýge múmkindigi bar. Sondaı-aq dıplomnyń elektrondyq nusqasy elektrondyq úkimettiń mobıldi qosymshasynyń «Tsıfrlyq qujattar» bóliminde ornalastyrylǵan, - dep atalyp ótken komıtet málimetinde.
Buǵan deıin ShQO-da jalǵan dıplom jasatqan jattyqtyrýshy sottalǵanyn jazǵan edik.
