Jalǵan dıplomdardyń satylýymen kúresý úshin ne isteldi
ASTANA. KAZINFORM – QR Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jalǵan dıplomdardyń satylýymen kúreste qandaı sharalar qabyldanyp jatqanyn túsindirdi.
«2021 jyldan bastap «Bilim týraly» Zańynyń 39-babyna sáıkes, Sot tóreligi akademııasyn, áskerı, arnaýly oqý oryndaryn, densaýlyq saqtaý salasyndaǵy joǵary nemese joǵary oqý ornynan keıingi bilim berý baǵdarlamalaryn iske asyratyn uıymdardy qospaǵanda, bilim berý qyzmetimen aınalysýǵa lıtsenzııasy bar jáne akkredıtteý organdarynyń tizilimine engizilgen, sondaı-aq tirkelgen joǵary oqý oryndary bilim týraly ózindik úlgidegi qujattardy beredi. Mınıstrlik joǵary oqý oryndarynyń túlekterine beriletin ózindik úlgidegi bilim týraly qujattardyń mazmunyna qoıylatyn negizgi talaptardy, bilim týraly qujattardyń serııasyn bekitti. Ózindik úlgidegi qujattardyń nómirleri men QR kodtaryn generatsııalaý «Bilim týraly qujattardyń nómirlerin generatsııalaý» arnaıy servısi arqyly júzege asyrylady», - delingen atalǵan vedomstvonyń Kazinform agenttigine bergen jaýabynda.
Generatsııa «Joǵary bilim berýdiń biryńǵaı platformasy» aqparattyq júıesinde (JBBP) stýdentter týraly málimetter negizinde júzege asyrylady. Arnaıy servıs joǵary oqý oryndarynyń ókilderine ýnıversıtet júıesin JBBP AJ-men ıntegratsııalaý arqyly stýdent jaıynda tolyq málimet (mamandyq, úlgerim, oqý baǵdarlamasy boıynsha akademııalyq kredıtterdiń jetkilikti sanyn ıgerý, oqýǵa túsýge/aýysýǵa buıryqtyń, kýrstan kýrsqa aýysý týraly buıryqtardyń bolýy) bolǵan jaǵdaıda ǵana bilim týraly qujattardyń serııalary men nómirlerin jasaýǵa múmkindik beredi.
«Joǵary bilim berýdiń biryńǵaı platformasynda stýdent derekteri bolmaǵan jaǵdaıda, dıplom nómirin generatsııalaý múmkin emes. Sonymen qatar, «Qazaqstan Respýblıkasynyń aýmaǵynda taratylatyn buqaralyq aqparat quraldarynyń monıtorıngin júrgizý qaǵıdalaryn jáne ony esepteý ádistemesin bekitý týraly» Aqparat jáne qoǵamdyq damý mınıstriniń 2019 jylǵy 29 sáýirdegi № 84 buıryǵyna sáıkes, Mádenıet jáne aqparat mınıstrligi men Іshki ister mınıstrligi bilim týraly jalǵan dıplomdardy daıyndaý jáne ótkizý faktilerin anyqtaý ári jolyn kesý boıynsha turaqty negizde jumys atqaryp jatyr. Bul sharalar joǵary nemese joǵary oqý ornynan keıingi bilim týraly qujattardyń zańsyz aınalymyn boldyrmaýǵa yqpal etedi», - dep atalyp ótken komıtet aqparatynda.
Buǵan deıin joǵary bilim týraly jalǵan dıplomdarǵa qatysty qandaı jaza qarastyrylǵanyn jazǵan edik.
