Jalǵan dıplom jarnamasyna stýdentterdiń túpnusqa dıplomy qoldanylady – Sergeı Pen
ASTANA. KAZINFORM – Jalǵan dıplom jarnamasyna stýdentterdiń túpnusqa dıplomy qoldanylady. Bul týraly Jibek Joly telearnasy «Fokýs vnımanııa» baǵdarlamasynda Maqsut Narikbayev University-niń provosty Sergeı Pen aıtty.
«Basqa joǵary ornynan aýysqan kezde qabyldaý komıssııasyna ákeletin, ózimiz kórgen dıplomdar ádette birden kózge túsedi. Mór sáıkes kelmeıdi nemese mamandyq ataýy birtúrli bolady. Akademııalyq salada jumys isteıtin adamdardyń kózderi jattyqqan. Sapasy nemese qorǵanys deńgeıine qatysty aıtar bolsaq, 3 jyl boldy JOO-lar derbes úlgidegi dıplomdardy berip keledi. Sondyqtan dıplomda derekterden, QR-kod nemese ishki tirkeýden ózge eshqandaı qorǵanys deńgeıi bolmaýy múmkin. Mundaı is panatseıa emes. Al olardyń basyp shyǵaratyny óte sapaly baspahanalyq jumys. Olar moneta saraıy jasaǵandaı qylýǵa tyrysady. Bárinen buryn bizdi mundaı qyzmetterge stýdentterdiń túpnusqa dıplomdaryn paıdalanatyn jarnama máselesi qatty alańdatady», - dedi Sergeı Pen.
Al zańger Mereke Ǵabdýalıev jalǵan dılom jasaý barlyq ýaqytta bolǵanyn alǵa tartady.
«Qazir másele tipti tereńde jatyr. Qoǵamymyz úshin jalǵan dıplommen kelgender qaýip tóndire qoımaıdy. Bizdiń qoǵam úshin JOO-da dıplomdy zańdy túrde alǵan, biraq, sol dıplomǵa saı bilimi joq adamdar qaýipti. Biz adamdar nagradalarymen, dıplomdarymen maqtanatyn jalǵan ıdealdar qoǵamynda ómir súrip jatyrmyz. 7-8 joǵary bilimi bar adamdar kezdesedi. Biz bilimin teksere almaımyz. Óıtkeni, olarǵa dıplomdy sol kezdegi Ǵylym jáne joǵary bilim lıtsenzııasy bar JOO-lar berdi. Ótken jyldardaǵy osy jaıt úlken problema jáne ulttyq qaýipsizdigimizge soqqy», - dedi zańger.
