Jalǵan dıplom satýmen aınalysatyn taǵy bir saıt áshkere boldy - BǴM

NUR-SULTAN. QazAqparat – Bilim jáne ǵylym vıtse-mınıstri Rústem Bıǵarı dıplom satatyn resýrstardan, ıaǵnı alaıaqtardan saq bolýǵa shaqyrady, dep habarlaıdy QazAqparat tilshisi.

«Biz ınternette dıplom satatyn resýrstarǵa árdaıym monıtorıng júrgizip otyramyz. Olardy tapqan kezde birden dabyl qaǵyp, arnaıy organdarǵa jiberemiz. Osylaısha domen óshiriledi. Jarnama jarqyraǵan ádemi dıplomdardy, baǵalardy, qandaı da bir akkredıtatsııalardy kórsetedi. Dostar, abaı bolyńyzdar», - dep jazdy vıtse-mınıstr Facebook paraqshasynda.

Jazbadan túsingenimiz, saıttyń ataýy - Diplomas Universities of Kazakhstan nemese kmiparasat.kz.

Vıtse-mınıstrdiń habarlaýynsha, joǵary oqý oryndary beretin dıplomnyń bári tirkeledi.

«Búkil dıplom bizdiń bazada saqtalady. Adamnyń dıplomynyń shyn-ótirigin anyqtaý qıyn da emes. Alaıaqtardan abaı bolyńyz», - dep jazady Rústem Bıǵarı.