Qostanaıda jalǵan terrorlyq habarlama taratqan oqýshy jazalandy
QOSTANAI. KAZINFORM — Jasóspirim synyptasynyń telefonyn paıdalanyp, mektepke «jarylǵysh zat qoıyldy» degen jalǵan habar taratqan. Ol muny «ázil úshin» jasaǵanyn aıtqan. Bul týraly Qostanaı oblysynyń polıtsııa departamenti málim etti.
Qostanaıda oqýshynyń mektepterdiń birinde bomba qoıyldy degen habarlamasynan keıin jedel qyzmetter shuǵyl túrde jumyldyryldy. Habarlamadan keıin baılanys birden úzilgen, bul jaǵdaıdyń aýyrlyǵyn arttyrdy.
Jedel áreket dereý bastaldy:oqıǵa ornyna polıtseıler, jarylǵysh zattardy zalalsyzdandyrý qyzmeti, órt sóndirýshiler jáne medıtsına qyzmetkerleri jetti. Oqýshylar men mektep qyzmetkerleri jedel túrde evakýatsııalandy. Ǵımarat pen oǵan irgeles aýmaq muqııat tekserilgennen keıin qaýipti zattar tabylǵan joq. Osylaısha, qaýip rastalmady.
Jedel jumystyń nátıjesinde polıtseıler jalǵan qońyraýdy basqa mekteptiń 7-synyp oqýshysy jasaǵanyn anyqtady. Ol synyptasynyń telefonyn paıdalanǵan jáne muny «ázil úshin» jasaǵanyn, saldaryn túsinbegenin moıyndady.
Jasóspirimniń qylmystyq jaýapkershilik jasyna tolmaýyna baılanysty terrorızm aktisi týraly kórineý jalǵan habar berý faktisi boıynsha qozǵalǵan qylmystyq is toqtatyldy. Alaıda kámeletke tolmaǵan balanyń ata-anasy tárbıeleý mindetterin tıisti oryndamaǵany úshin ákimshilik jaýapkershilikke tartyldy.
Sonymen qatar shaqyrtýǵa jaýap berý barysynda tótenshe qyzmetterdiń jumsaǵan shyǵyndaryn óteý máselesi qaralatyn bolady.
Terrorızm aktisi týraly kórineý jalǵan habar bergeni úshin eń joǵary jaza — bes jylǵa deıin bas bostandyǵynan aıyrý.
Quqyq qorǵaý organdary ata-analarǵa úndeý jasaıdy: balalarmen qaýipsizdik týraly sóılesińizder, mundaı «ázilderdiń» saldaryn túsindirińizder jáne telefon men áleýmettik jelilerdi paıdalanýyn baqylańyzdar. Mundaı oqıǵalardyń aldyn alý — eresekterdiń ortaq mindeti.
Aıta keteıik, tumaýdyń órship turǵanyna baılanysty Qostanaıda barlyq mektep qashyqtan oqyp jatyr.