Jalǵan dári-dármekti aktsızdik júıe anyqtaıdy - Densaýlyq mınıstrligi

ASTANA. QazAqparat - Búginde álem boıynsha jalǵan dári-dármekterdiń saýdasy qyzyp tur. Qazaqstanda da ondaı problema bar. Qazirgi kezde densaýlyq saqtaý mınıstrligi jalǵan preparattarǵa qarsy arnaıy júıeni engizip jatyr, dep xabarlaıdy QazAqparat tilshisi.

«Bizge keletin dári-dármektiń árbir qaptamasynda arnaıy kod bolýy shart. Bylaısha aıtqanda, aktsızdik markalar júıesi tárizdi. Ony alkogol men temeki ónimderi salasynda qoldanady. Osylaısha, dáriniń árbir qaptamasy esepke alynady. Demek, quzyretti memlekettik organ da, Farmatsııa komıteti de qoldan jasalǵan dári-dármekterdi anyqtaı alady. Bunyń barlyǵy baqylaýda bolady», - dedi Farmatsııa komıtetiniń ókili Arnur Nurtaev búgin Astanada dári-dármekterdi tıimdi paıdalaný máselelerine arnalǵan xalyqaralyq konferentsııada.

Budan bólek, dári-dármek shyǵarýshy kompanııalardy tekserý sharalary kúsheıtiledi. Buryn ondaı kásiporyndar bir ret qana ınspektsııadan ótse, aldaǵy ýaqytta úsh jylda bir ret tekseriletin bolady. Osynyń arqasynda medıtsınalyq preparattardyń sapasyn arttyrý josparlanǵan.

Aıta keteıik, konferentsııanyń resmı bóliminde Arnur Nurtaev arnaıy zańnyń aıasynda dári-dármektiń baǵasy qalaı arzandaıtynyn túsindirdi. Al professor Maqsut Quljanov dári-dármektiń qymbatshylyǵyn bir mysalmen dáleldep berdi.