Jalǵan býhgalterlik qujattar jasaýmen aınalysqan top qylmysy áshkerelendi

PAVLODAR. QazAqparat - Pavlodar oblystyq ekonomıkalyq tergeý departamenti salyq tóleýden jaltarý maqsatynda jalǵan zańdy tulǵalardyń atynan býhgalterlik qujattar jasaýdy júzege asyrǵan uıymdasqan qylmystyq topty áshkereledi, dep habarlaıdy QazAqparat tilshisi.

Vedomstvo málimetine qaraǵanda, 2019 jyldyń 27 maýsymynda saǵat 12:00 shamasynda ekinshi deńgeıli bank fılıalynda jalǵan qurylǵan JShS shottarynan 7,5 mln teńge kóleminde qolma-qol aqsha qarajatyn alý kezinde «A» degen azamat ustalǵan. Sol kúni fıgýranttardyń turǵylyqty mekenjaılary men keńse úıjaılaryn tintý kezinde 9 200 AQSh dollary, 20 mln teńgeden astam aqsha, 11 mór, zańdy tulǵalardyń 14 elektrondyq-tsıfrlyq qoltańbalary, býhgalterlik qujattar jáne uıymdastyrý tehnıkasy alyndy.

«Sotqa deıingi tergep-tekserý barysynda uıymdasqan qylmystyq toptyń 2015 jyldan bastap áreket etkendigi anyqtaldy. 23 jalǵan jaýapkershiligi shekteýli seriktestik qurylǵan. Búgingi tańda uıymdasqan qylmystyq topqa 32 adamnyń qatysy bar ekendigi belgili boldy. Úsheýi sot sanktsııasymen qamaýǵa alyndy, bireýine halyqaralyq izdeý jarııalandy. Jalǵan kásiporyndardyń kontragentteri jalpy somasy 5,1 mlrd teńgege salyq tóleýden jaltarǵan.

Bankterdegi shottardan jalpy somasy 4,1 mlrd teńgeniń kóleminde qolma-qol aqsha sheshilgen», - dep atap ótedi vedomstvodan.

Departamenttiń naqtylaýynsha, kúdiktilerdiń múlki tárkilenip, 12 jylǵa deıin bas bostandyqtarynan aıyrylýy múmkin. Qazirgi ýaqytta qylmystyq jolmen, onyń ishinde shetelde tabylǵan múlikterdi anyqtaý sharalary júzege asyrylyp jatyr.