Jalǵan brend: Almatyda júzdegen «Louis Vuitton» sómkesi tárkilendi
ASTANA. KAZINFORM — Ádilet mınıstrliginiń qyzmetkerleri «Louis Vuitton» jáne «Nesquik» taýar belgisimen jalǵan ónimderdi zańsyz paıdalaný faktilerin anyqtady.
Almaty qalasy Ádilet departamenti zııatkerlik menshik quqyqtaryn qorǵaý salasyndaǵy memlekettik saıasatty iske asyrý sheńberinde álemge tanymal brendterdiń taýar belgilerin zańsyz paıdalanýdy anyqtaý jáne onyń jolyn kesý boıynsha is-sharalar júrgizdi.
Almaty qalasy Polıtsııa departamentimen (Kıberpolıtsııa) birlesip júrgizilgen tekserý barysynda «Nesquik» taýar belgisin zańsyz paıdalaný faktisi boıynsha qala aýmaǵynda tirkelgen taýar belgisimen shatastyrý dárejesine deıin uqsas belgilerdi zańsyz paıdalaný arqyly ónimder ótkizilgen. Nátıjesinde zańsyz aınalymnan jalpy quny 4 mıllıon teńgeden asatyn 2000-nan astam zańsyz ónim tárkilendi.
Sondaı-aq Almaty qalasy Ádilet departamentimen jospardan tys tekserý sheńberinde «Louis Vuitton» taýar belgisin zańsyz paıdalaný faktileri anyqtaldy.
— Ónimderdiń sapasynyń tómen ekeni jáne zańnama talaptaryn buza otyryp satylǵany belgili boldy. Zańsyz aınalymnan júzdegen kontrafaktilik ónim tárkilendi. Anyqtalǵan quqyqbuzýshylyqtar boıynsha ákimshilik hattamalar toltyrylyp, kináli tulǵalardy jaýapkershilikke tartý úshin materıaldar sotqa joldandy, — delingen habarlamada.
Ádilet organdary júrgizip otyrǵan jumys adal básekelestikti qamtamasyz etýge, quqyq ıelenýshilerdiń quqyqtaryn qorǵaýǵa jáne kontrafaktilik ári áleýetti qaýipti ónimderdiń aınalymynyń aldyn alýǵa baǵyttalǵan.
Osyǵan deıin Apple — álemdegi eń qymbat brend atanǵanyn jazdyq.
