Jalǵan bankrottyqqa jol bermeý kerek - depýtat
ASTANA. QazAqparat - Búgin Parlament Májilisinde ońaltý jáne bankrottyq rásimderdi jetildirý zań jobasynyń tanystyrylymynda depýtat Omarhan Óksikbaev jalǵan bankrottyqqa jol bermeý máselesin kóterdi, dep habarlaıdy QazAqparat.
«Árıne, zań jobasynda kóptegen progressıvtik tásilder kózdelgen. Alaıda biz memleket múddesin qorǵaýdy da erekshe nazarda ustaýymyz kerek. Atap aıtqanda, jalǵan bankrottyq jaǵdaıǵa alyp keletin tásilder bar. Taǵy bir pysyqtaıtyn másele - ol býhgalterlik balansqa súıenýge qatysty. ıAǵnı, olardyń derekterine súıenip, málimetterdi nazarǵa alý qaralyp otyr. Al shyntýaıtyna kelgende, osy býhgalterlik balanstyń ózi kóp jaǵdaıda naqty emes jáne kásiptik deńgede emes. Sondyqtan Qarjy mınıstrligi bul máseleni ózderiniń baqylaýynan jiberip qoıǵandyqtaryn, osy oraıda bul baǵyttaǵy ádisnamany jaqsartý qajetti týraly aıttym. Óıtkeni býhgalterlik balansqa negizdelsek, onda ol naqty qujat bolýy kerek», - dep Omarhan Óksikbaev tilshilerge bergen suhbatynda.
Depýtattyń paıymynsha, bul baǵyttaǵy sharalar baqylaýǵa jatýy tıis. Memleket óz múmkindigimen onyń barlyǵyn baqylaıtyn kúshi joq, sondyqtan osy zań jobasyna sony qadaǵalaıtyn jaǵdaıdy eskerý kerek. Sebebi sýbektiniń ózi bergen derekke súıenýge ekpin qoıylsa, onda memlekettiń múddesi qorǵalmaýy múmkin.
«Ózderińiz bilesizder, elimizde ekinshi deńgeıli biraz bankter bankrotqa ushyrap, ózderiniń jumystaryn toqtatýda. Sol bankterde bizdiń kvazımemlekettik sektorymyzdyń depozıtke salǵan qarjylary qalyp otyr. Ol qarjy qaıtarylmasa, memleketke zııan keltiriledi. Sondyqtan bul turǵyda zań jobasy aıasynda naqtylaıtyn qadamdar bar», - dedi ol.
Atap aıtqanda, búgin Májiliste «Qazaqstan Respýblıkasynyń keıbir zańnamalyq aktilerine ońaltý jáne bankrottyq rásimderin jetildirý máseleleri boıynsha ózgerister men tolyqtyrýlar engizý týraly» zań jobasy tanystyryldy.
Zań jobasynda bankrottyq rásimderdi ótkizý merzimin qysqartý eskerilgen. Bul rette kredıtorlar jınalysynyń birqatar ókilettikterin mobıldi kredıtorlar komıtetine berý, basqarýshylardyń banktik qupııany quraıtyn málimetti alý tártibin jeńildetý, ádeıi jáne jalǵan bankrottyq úshin jaýaptylyqqa tartý tártibin ózgertý qarastyrylǵan.
Foto: e-history.kz
