Balabaqshaǵa barmaıtyn balany tirkegen uıymdar vaýcherlik júıeden shyǵarylady
ASTANA. KAZINFORM — Qazaqstanda vaýcherlik qarjylandyrýǵa qatysatyn balabaqshalardyń málimetteri toqsan saıyn tekserilip otyrady. Eger balabaqshada is júzinde barmaıtyn balalar tirkelgeni nemese jalǵan málimet engizilgeni anyqtalsa, ony vaýcherlik júıeden shyǵarý qarastyrylady. Bul týraly Kazinform agenttiginiń saýalyna QR Oqý-aǵartý mınıstrligi Mektepke deıingi bilim berý departamentiniń dırektory Gúlnara Iskakova málimdedi.
Onyń aıtýynsha, mundaı jaǵdaılardy anyqtaý úshin vaýcherlik qarjylandyrý júıesine táýekelderdi basqarý tetigi engizilgen. Tekserýdi Qarjy ortalyǵy toqsanyna bir ret júrgizedi.
— Atalǵan júıe jalǵan kontıngent pen fıktıvti jazbalardy anyqtaýǵa múmkindik berip otyr, — dedi Gúlnara Iskakova.
Balabaqshalar usynǵan málimetter memlekettik elektrondy aqparattyq júıeler, onyń ishinde Ulttyq bilim berý derekter qory arqyly tekseriledi. Eger tekserý barysynda málimetterdiń durys emestigi anyqtalsa, Qarjy ortalyǵy tıisti bilim basqarmasyna balabaqshany qyzmet kórsetýshiler tiziminen alyp tastaý qajettigi jóninde habarlaıdy.
Vaýcherlik júıede balabaqshaǵa qarajat balanyń oǵan naqty barǵany ata-ana tarapynan rastalǵannan keıin ǵana tólenedi. Osy tetik pen tekserýlerdiń nátıjesinde pılottyq joba aıasynda 35 mlrd teńgeden astam bıýdjet qarajaty únemdelgen.
Qazir vaýcherlik qarjylandyrý pıloty 20 qala men 23 aýdandaǵy shamamen 6 myń mektepke deıingi uıymda jumys isteıdi. Joba aıasynda 1,2 mln-nan astam vaýcher berilgen.
Aıta keteıik, buǵan deıin únemdelgen 35 mlrd teńgeniń qaıda jumsalǵany habarlandy.
