Jalǵan aqsha jasap, eldi aldap kelgenniń isi sotqa jetti - Qostanaı
ASTANA. QazAqparat - Qostanaı qalasynyń №2 sotynyń óndirisine jalǵan aqsha banknottaryn birneshe ret daıyndaǵan azamat V.-ǵa qatysty qylmystyq is sot óndirisine kelip tústi, dep habarlady atalǵan sottyń baspasóz qyzmetinen.
Buryn sottalǵan V esimdi turǵyn qasaqana, QR Ulttyq Bankiniń aqsha banknottaryn birneshe ret qoldan jasap, jalǵan aqshany paıdalanǵan. Ol jalǵan aqshany daıyndap, saqtap, ony ári qaraı ótkizý maqsatynda, 2012 jyldyń mamyrynda belgisiz tulǵalarmen birge kóshirme jasaý-kóbeıtý qurylǵysynyń túrli-tústi kartrıdjben jabdyqtalǵan jeke kompıýteri arqyly 2000 teńge nomınaldy jalǵan aqsha banknottaryn birneshe ret daıyndap shyǵarǵan. Jalǵan aqshany saýda ortalyqtarynda, bazarlarda, dúkenderde halyq tutynatyn jeńil-jelpi taýarlar men azyq-túlikke, sondaı-aq ózi mingen taksıge tólegen. Qaıtarymǵa shynaıy aqsha banknottar alyp otyrǵan. «Qylmystyq is 2014 jyldyń 20 tamyzynda sot óndirisine qabyldandy jáne aldyn ala tyńdaý 2014 jyldyń 25 tamyzynda ótedi» delingen baspasóz habarlamasynda.
