Jalǵan aqsha jasaǵany úshin Qazaqstan azamaty Grýzııadan ekstradıtsııalandy
ASTANA. KAZINFORM – Ol 2024 jyly Túrkııa Respýblıkasynan jalǵan banknottardy ákelip, Qazaqstan aýmaǵynda ótkizgen degen kúdikke ilingen. Bul týraly Bas prokýratýranyń baspasóz qyzmeti habarlady.
Bas prokýratýra men Qarjylyq monıtorıng agenttiginiń qyzmetkerleri, Qazaqstan Respýblıkasynyń Grýzııadaǵy elshiliginiń kómegimen Qazaqstannyń Memlekettik shekarasy arqyly ótkize otyryp, jalǵan banknottardy saqtaǵany jáne ótkizgeni úshin qylmystyq jaýaptylyqqa tartý maqsatynda Qazaqstan azamatyn Grýzııadan ekstradıtsııalady.
— Ol 2024 jyly Túrkııa Respýblıkasynan jalǵan banknottardy ákelip, Qazaqstan aýmaǵynda ótkizgen degen kúdikke ilingen. Qylmys jasaǵannan keıin kúdikti jasyrynyp, oǵan halyqaralyq izdeý jarııalanǵan. Osy jyldyń mamyrynda ol Grýzııa aýmaǵynda ustalyp, Qazaqstan Respýblıkasy Bas prokýratýrasynyń suraýy boıynsha otanyna ekstradıtsııalandy, — delingen habarlamada.
Qazirgi ýaqytta kúdikti tergeý ızolıatoryna qamaldy.
Aıyptalǵan qylmysty jasaǵany úshin múlkin tárkilep, bes jyldan on jylǵa deıin bas bostandyǵynan aıyrý túrindegi jaza kózdelgen.
Eske sala keteıik, buǵan deıin Bas prokýratýra uqsas qylmysty jasaǵany úshin Shvetsııadan Qazaqstan azamatshasyn ekstradıtsııalap, qazirgi tańda ol sottaldy.
Aıta ketelik alaıaqtyq jasap, izdeýde bolǵan Qazaqstan azamaty Saýd Arabııasynan ekstradıtsııalanǵan edi.