Jalǵan aqsha satý faktisi 5 ese kóbeıgen - qarjy polıtsııasy
ASTANA. 18 sáýir. QazAqparat - 2012 jyly qarjy polıtsııasy organdary jalǵan aqsha jasaý jáne satý faktileri boıynsha 2878 qylmystyq is qozǵady, bul 2011 jylmen salystyrǵanda 5 ese kóp.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıngte atalmysh vedomstvonyń resmı ókili Murat Jumanbaı málim etti.
Onyń aıtýynsha, jalǵan banknottar saýda núktelerinde, janar-jaǵarmaı stansalarynda, aqsha aıyrbastaý pýnktilerinde jáne bankilerde jalpy aqshanyń arasynan anyqtalady. Sondyqtan naqty jasaýshyny anyqtaý árqashan múmkin bola bermeıdi.
«Osyǵan qaramastan, ótken jyly qarjy polıtsııasy osy sanattaǵy ashylǵan qylmystar boıynsha sotqa 1062 qylmystyq isti joldady», - deıdi ol.
Resmı ókildiń keltirgen málimetteri boıynsha, 2012 jyl boıy qarjy polıtsııasynyń qyzmetkerleri jalǵan aqsha jasaıtyn 15 astyrtyn tsehtiń qyzmetin áshkereledi.
Almaty qalasynda A.Lopatın 1 jylǵa bas bostandyǵynan aıyrýǵa, M.Rassadın - 7 jylǵa, V.Býtın - 8 jylǵa bas bostandyǵynan aıyrýǵa sottaldy. Olar 5000 teńgelik jalǵan kýpıýralardy úlken partııalarmen jasap satýmen aınalysqan. Olardyń úıinen satýǵa daıyn jalpy somasy 5 mln 470 myń teńgeni quraıtyn jalǵan 5000 teńgelik banknotalar tárkilendi.
«Mundaı qylmystardy jeke tulǵalar da, uıymdasqan qylmystyq toptar da jasaıdy. Olardyń aıyrmashylyǵy kólemi men sapasynda bolady», dep atap ótti resmı ókil.
Máselen, B. Aınabekovtiń basshylyǵymen 2009-2012 jyldar aralyǵynda bir top qylmyskerler uıymdasqan qylmystyq top quryp, jalǵan aqsha jasap satýmen aınalysqan. Qylmystyq is boıynsha 10000 jáne 5000 teńgelik jalǵan aqsha banknotalaryn Astana qalasy, Shyǵys Qazaqstan, Soltústik Qazaqstan, Ońtústik Qazaqstan, Aqmola, Atyraý, Mańǵystaý, Qostanaı jáne Jambyl oblystarynda satýdyń 44 faktisi anyqtaldy.
