Jalǵan aqsha kóbeıdi: eń jıi qoldan jasalǵany 5 000 teńgelik kýpıýralar
ASTANA. KAZINFORM — Ulttyq bank pen ekinshi deńgeıli bankter 2025 jyldyń birinshi jartyjyldyǵynda 465 150 teńgeniń 96 jalǵan aqsha belgisin (93 banknota jáne 3 moneta) anyqtady.
Kóbine 5 000 teńgelik nomınal qoldan jasalǵan. 85 dana banknota jalpy tárkilengen aqshalardyń 88,5%-y. Odan keıin 5 dana (5,2%) – 2 000 teńgelik nomınalǵa, 3 dana (3,1%) – nomınaly 10 000 teńgelik banknotalarǵa, qalǵan 3,2% – monetalarǵa tıesili.
Ulttyq bank shynaıy banknotalardy qoldan jasalǵan aqshadan óz betinshe ajyratýǵa kómektesetin qarapaıym erejelerdi eske salady.
Jalǵan banknotalar, ádette, kádimgi ofsettik qaǵazǵa túrli tústi prınter arqyly jáne kompıýterlik tehnıkanyń kómegimen jasalady.
Mıkrotekster bulyńǵyr keledi jáne ulǵaıtqan saıyn anyqtyǵyn joǵaltady.
Jalǵan banknotada sýtamǵy belgisi joq.
Patch elementiniń kólemdi beınesi joq jáne kádimgi boıaýmen basylǵan, kún belgisi sáýlesiniń jan-jaqqa shashyraǵan golografııalyq áseri men nomınaldyń tsıfrlyq keskininen oıý-órnekke aýysý áseri bolmaıdy.
Qorǵanysh jibi dınamıkalyq jáne túsin ózgerte alatyn áserden ada, ári jaryqqa tosyp qaraǵanda tutastyǵy baıqalmaıdy.
Shynaıy banknotalarda kózben qarap jáne qolmen ustap anyqtaýǵa bolatyn birneshe qorǵanysh belgileri bar. Ol belgilermen Ulttyq banktiń resmı saıtynda tanysýǵa bolady.
Qazaqstan Ulttyq banki banknotalardy qoldan jasaýǵa jol bermeý úshin turaqty túrde jumys júrgizip keledi jáne azamattardy qolma-qol aqshany paıdalanǵan kezde muqııat ári saq bolýǵa shaqyrady.
Eger shynaıy aqsha belgilerine uqsas kúmándi banknotalar kezigetin bolsa, dereý quqyq qorǵaý organdaryna júgingen jón.
Aıta ketelik ótken jyly aınalymnan 80 mıllıon teńgeden astam jalǵan aqsha alynǵan.