Jalǵan aqsha: Qazaqstanda teńgeniń qaı kýpıýrasyn qoldan jıi jasaıdy

ASTANA. QazAqparat - Respýblıka boıynsha bir jyldyń ishinde 33,4 mln teńge bolatyn jalǵan aqsha anyqtaldy. Onyń ishinde ulttyq jáne sheteldik valıýtalar bar, dep xabarlaıdy QazAqparat tilshisi.

Memlekettik kirister komıtetiniń Profılaktıkalyq jumys jáne baqylaý basqarmasy basshysy orynbasarynyń mindetin atqarýshy Erden Jumanyń aıtýynsha, búginde qylmyskerler kóp jaǵdaıda eski nomınaldaǵy 2 000 teńgeni jasaıdy. «Sebebi ol kýpıýranyń qorǵanys elementteri eskirgen. Al 5 000, 10 000, 20 000 teńgelikterdi qoldan jasaý qıyn. Sosyn kýpıýranyń somasy úlken bolsa, ony jiti tekseredi. Bárimiz solaı isteımiz. Máselen, dúkende 10 000 teńgeni bersek, satýshylar birden teksere bastaıdy. Al 2 000 teńgeni olaı teksermeıdi. Qylmyskerler osyny jaqsy biledi. Sodan keıin usaq aqshany jasaýǵa tyrysady», - dedi E.Juma búgin Astanada ótken baspasóz máslıxatynda.

Onyń sózine qaraǵanda, qylmyskerler, kóbinise, ulttyq valıýtany jasaıdy. Sebebi ony taksıde, dúkende, bazarda jáne taǵy basqa jerderde bere salǵan jeńil. Al sheteldik valıýtany aıyrbastaý qajet. Ondaı aqshany aıyrbastaý beketterinde arnaıy qurylǵylarmen tekseredi.

Aıta keteıik, ótken jyly Qazaqstanda jalǵan aqsha jasaý boıynsha 214 qylmys tirkeldi. Sonyń ishinde 2 511 dana ulttyq valıýta, onyń jalpy somasy 7,4 mln teńgeni qurady. Al sheteldik valıýtanyń 497 jalǵan kýpıýrasy anyqtaldy. Ol aqshanyń somasy 26 mln teńgeden asty.