Jalǵan aqsha banknotalaryn jasaǵandar belgili boldy - Qarjy polıtsııasy
ASTANA. 2 aqpan. QazAqparat /Rýslan Ǵabbasov/ - Sońǵy kezde respýblıka boıynsha saýda jáne qyzmet kórsetý oryndary men ekinshi deńgeıdegi bankterde jalǵan aqsha banknotalaryn anyqtaý faktileri kóbeıip ketti, dep habarlanady QR Ekonomıkalyq qylmysqa jáne sybaılas jemqorlyqqa qarsy kúres agenttiginiń remı saıtynda.
Agenttik jáne Jambyl oblysy men Astana qalasy boıynsha qarjy polıtsııasy departamentteriniń birlesip júrgizigen jedel-izdestirý sharalary nátıjesinde, uzaq ýaqyt boıy Qazaqstan aýmaǵynda jalǵan aqsha belgilerin jasaýmen jáne satýmen aınalysyp kelgen tulǵalar tobynyń zańsyz qyzmeti áshkerelendi.
2011 jylǵy 2 jáne 16 qarashada Agenttik qyzmetkerleri Astana qalasynyń I. degen azamatshasynan 1,1 mln.teńge jáne 400 myń teńge somasynda jalǵan banknotalardy satyp alýdy júzege asyrǵan.
Arnaıy jedel-izdestirý sharalarmen jalǵan banknotalardy jasaýmen Jambyl oblysy turǵyndary G.Jalbıeva men S.Baqtybaev jáne OQO turǵyny N.Baıqojaev aınalysatyndyqtary anyqtaldy.
2012 jylǵy 5 qańtarda jalǵan aqshany iri mólsherde jasaý jáne satý faktisi boıynsha qylmystyq is qozǵaldy.
Qylmystyq isti tergeý barysynda jalǵan aqshalardy satý sotpen qaýipti retsıdıvıst dep tanylǵan jáne tonaý jasaǵany úshin 5 jylǵa bas bostandyǵynan aıyrylyp, jazasyn ótep jatqan B.Aınabekov arqyly júzege asyrylyp otyrǵany belgili boldy.
2012 jylǵy 19 qańtarda Jalbıeva ustaldy, tintý barysynda odan jalpy somasy 170 myń teńgeni quraıtyn 5 myń jáne 10 myń teńge nomınalyndaǵy qaıtalanatyn nómerleri bar jalǵan banknotalar tabyldy.
Aǵymdaǵy jylǵy 21 qańtarda Baıqojaevtyń meken-jaıyn tintý barysynda ol 2000, 5000, 10 000 teńge, 100 AQSh dollary jáne 1000 rýbl banknotalarynyń elektrondyq nusqalary bar tasymaldanbaly qatty dıskini óz erkimen berdi.
Tergeý eksperımenti barysynda Baıqojaev nomınaly 10 000 teńgelik jalǵan banknotany jasap kórsetti.
22 qańtarda Jalbıeva onyń kúnásin moıyndaǵanyn, qylmysty ashýdaǵy tergeýge kómekteskenin jáne onyń qaýipsizdigin qamtamasyz etý týraly kelip túsken aryzyn eskere otyryp, úı qamaýyna alyndy. Bıylǵy 25 qańtarda kórsetilgen aıǵaqtar boıynsha Baıqojaevqa qatysty eshqaıda shyqpaý týraly bultartpaý sharasy taǵaıyndaldy. Bul tulǵalarǵa qaýipsizdik sharalary qoldanyldy. Qazirgi ýaqytta Baqtybaevtyń meken-jaıy anyqtalýda.
«Búgingi kúni bul qylmysqa qatysýshy basqa tulǵalar anyqtalýda jáne atalǵan tulǵalar tobynyń Qazaqstan aýmaǵynda jalǵan aqshany jasaý jáne satýdyq ózge faktilerine qatysy tekserilýde.
Qylmystyq is tergelýde, tergeý nátıjeleri qosymsha habarlanatyn bolady»,-delingen bul málimetterde.
