Jalǵan aqparatpen bólisken mektep dırektory kópshilikten keshirim surady
TALDYQORǴAN. QazAqparat - Almaty oblysynyń Tekeli qalasyndaǵy №5 orta mekteptiń dırektory Elmıra Imanberdıeva óziniń áreketi úshin halyqtan keshirim surady, - dep habarlaıdy QazAqparat tilshisi.
Mektep basshysy whatsapp jelisi arqyly koronavırýs jóninde jalǵan aýdıojazbamen bólisken.
«Men Imanberdıeva Elmıra Seıdahmetqyzy №5 orta mekteptiń muǵalimder chatyna asyǵys, bilmestikpen, jalǵan dybystyq málimetti jibergenim úshin keshirim suraımyn. Aldaǵy ýaqytta shyndyqqa janaspaıtyn, tekserilmegen aqparatty taratý, taratpaýǵa ýáde beremin» degen beınejazbada mektep dırektory E. Imanberdıeva.
Aıta keteıik, jalǵan aqparat taratqan adam zań boıynsha 2 jyl nemese odan da kóp jylǵa basbostandyǵynan aıyrylýy múmkin. Almaty oblystyq Polıtsııa Departamenti baspasóz qyzmetiniń málimetinshe, kúni keshe «jarylǵysh zat» qoıyldy degen jalǵan aqparat bergeni úshin Talǵar aýdanynyń 1977 jylǵy turǵyny 2 jyl 6 aıǵa bas bostandyǵynan aıyryldy. Sondyqtan halyqty aqparatty bóliskende abaı bolýdy, mamandar eskertedi.
«Jaý jaǵadan alǵanda, bóri etekten alady. Myna kisi keshe shaǵyn shaharymyz Tekelini tikeden tik turǵyzdy. Shaharda vırýs shyqty dep, WhatsApp-qa habarlama taratyp, jalǵan aqparatpen bólisti. Endi mine úlken basymen keshirim surap álek. Onyń ústine mektep dırektory»-, dep jazdy Almaty oblysy ákiminiń baspasóz hatshysy Ǵalymurat Júkel óziniń áleýmettik jelidegi paraqshasynda.
