Jalǵan aqparatqa qarsy ortalyq jarty jylda 68 feıkti joqqa shyǵardy
ASTANA. KAZINFORM – Bıylǵy alǵashqy alty aıda Jalǵan aqparatqa qarsy is-qımyl ortalyǵy memlekettik organdarmen birlesip 68 jalǵan ári manıpýlıatsııalyq aqparatty joqqa shyǵardy. Bul týraly QR Prezıdenti janyndaǵy Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵynyń basshysy Rýslan Bekarslanov «SAILAÝ-2026: medıa jáne tsıfrlyq platformalar» sarapshylyq alańynda málim etti.
Onyń aıtýynsha, birinshi toqsanda 40, ekinshi toqsanda 28 jalǵan aqparat anyqtalǵan. Bul kezeń jalpyhalyqtyq referendýmǵa daıyndyq jáne ony ótkizý ýaqytymen tuspa-tus kelgen. Ortalyqtyń jumysyna mınıstrlikter, óńirlik ákimdikter men basqa da uıymdardy qosa alǵanda, 20-ǵa jýyq memlekettik organ men uıym tartylǵan.
Osy kezeńde mátin túrindegi jalǵan aqparatpen qatar, dıpfeıkter, qoldan jasalǵan aýdıojazbalar men messendjerlerde taratylǵan jalǵan daýystyq habarlamalar da tirkelgen. Rýslan Bekarslanovtyń aıtýynsha, mundaı materıaldar kóbine qoǵamnyń nazaryn birden aýdaratyn jáne turǵyndar arasynda qyzý talqylanatyn taqyryptarǵa qatysty taralady.
Referendým kezinde ortalyq jalǵan aqparat taraǵannan keıin ǵana áreket etpeı, taralýy múmkin feıkterdiń aldyn alýǵa basymdyq bergen.
– Biz feıkterdiń paıda bolǵanyn kútpeı, aldyn ala jumys júrgizdik. Aldymen ózge elderdegi saılaý men referendýmdar kezinde qandaı jalǵan aqparattar men dıpfeıkter taraǵanyn zerttep, olardyń bazasyn jasadyq. Buǵan qosa foto, vıdeo jáne aýdıojazbalardy jınaqtap, qajet bolǵan jaǵdaıda jarııalaıtyn túsindirmelerdi de aldyn ala daıyndadyq. Mundaǵy maqsat – referendým aldynda aýdıtorııanyń aqparatqa syn kózben qaraýyna yqpal etý, - dedi Rýslan Bekarslanov.
Sóıtip ártúrli elderde taraǵan foto, vıdeo jáne aýdıojazbalardy bir jerge jınaqtalyp, ár materıalǵa onyń qashan jáne qaı jerde alǵash jarııalanǵany týraly málimet qosylǵan.
– Máselen, Ispanııada nemese Italııada ótken saılaý kezinde bolǵan jaǵdaıdy Almaty oblysynda bolyp jatqan oqıǵa retinde taratýy múmkin. Sondyqtan buryn jarııalanǵan foto, vıdeo jáne aýdıojazbalardyń derekqoryn jasadyq. Onda materıaldyń shyqqan kúni men bolǵan jeri kórsetildi. Osyndaı feık qaıta tarasa, onyń qaıdan alynǵanyn birden kórsetip, ýaqyt joǵaltpaı jaýap berý úshin bul jumys aldyn ala júrgizildi, – dedi ol.
Sondaı-aq ortalyq óńirlerdegi ákimdiktermen jáne memlekettik organdarmen jedel baılanys ornatyp, ortaq is-qımyl algorıtmin aldyn ala pysyqtaǵan.
— Sonyń arqasynda referendým kúni týyndaǵan jaǵdaılarǵa alǵashqy mınýttarda jaýap berip, jalǵan aqparattyń keń taralýyna jol bermedik, - dedi Rýslan Bekarslanov.
Onyń aıtýynsha, ár memlekettik organ óz salasyna qatysty aqparatty eń aldymen ózi jarııalaýy qajet. Sebebi eshkim vedomstvonyń ózinen artyq ári jedel málimet bere almaıdy.
— Eger biz únsiz qalsaq, aqparattyq keńistik túrli qaýesetke tolady. Sondyqtan halyqqa túsindirý jumystaryn másele týyndaǵannan keıin emes, oǵan deıin júrgizýdiń mańyzy zor, - dedi ortalyq basshysy.
Aıta keteıik, Qazaqstannyń strategııalyq zertteýler ınstıtýty (QSZI) alańynda búgin saılaýaldy naýqandaǵy jasandy ıntellektiniń róli, tsıfrlyq tehnologııalardyń yqpaly jáne feık aqparatpen kúres máseleleri talqylandy.
