Jalǵan aqparatqa qarsy ortalyq: Quryltaı saılaýy qarsańynda feıkter kóbeıdi
ASTANA. KAZINFORM — Quryltaı saılaýy qarsańynda aqparattyq keńistikte feıkter men arandatýshylyq materıaldardyń taralýy kúsheıgen. JAQ.OrtCom ortalyǵy saılaý naýqany kezinde mundaı aqparatqa synı qarap, derekterdi resmı derekkózder arqyly tekserýge shaqyrdy.
Jalǵan aqparatqa qarsy is-qımyl ortalyǵy Quryltaı saılaýy qarsańynda aqparattyq keńistikte shynaıy emes málimetter, feıkter men arandatýshylyq materıaldardyń jappaı taralýy tirkelip otyrǵanyn málimdedi.
Aqparattyq yqpal etý tehnologııalarynyń júıeli túrde qoldanylyp jatqany baıqalady. Alǵashqy kezeńde arandatýshylyq sıpattaǵy aqparattyq sebep qalyptastyrylady, keıin ol anonımdi alańdarda jarııalanyp, odan soń bot-jeliler arqyly bir mezette jappaı taratylady. Bul jappaı taralý áserin jasandy túrde qalyptastyryp, keń qoǵamdyq rezonans bar degen jalǵan túsinik týǵyzýǵa múmkindik beredi.
Jarııalanymdardyń birdeı tezıstermen jáne uqsas vızýaldyq bezendirýmen sınhrondy túrde shyǵýy olardyń ortalyqtandyrylǵan ári uıymdasqan sıpatta ekenin kórsetedi. Keıinnen bul habarlamalar túrli platformalarda jappaı taratylady. Taralýdyń negizgi arnalary — anonımdi Telegram-arnalar, áleýmettik jelilerdegi qaýymdastyqtar jáne ózara baılanysty bot-akkaýnttardan quralǵan «jeliler». Jekelegen jaǵdaılarda shetelden úılestirilgen jumystyń aıqyn belgileri baıqalady.
Mundaı naýqandardy uıymdastyrýshylar men oryndaýshylardyń nazarynda qoǵam úshin asa mańyzdy taqyryptar — saılaý protsesi, syrtqy saıasat jáne áleýmettik-ekonomıkalyq máseleler tur. Mundaı kontenttiń edáýir bóligi jasandy ıntellekt tehnologııalarynyń kómegimen jasalady. Jalǵan, biraq shynaıy kórinetin aýdıo-, foto- jáne beınematerıaldar — dıpfeıkter ázirlenip, keıin keńinen taratylady. Mundaı áreketterdiń maqsaty — memlekettik ınstıtýttar men laýazymdy tulǵalardyń bedelin túsirý, bılik ınstıtýttaryna degen senimdi álsiretý jáne qoǵamda jasandy túrde áleýmettik shıelenis qalyptastyrý.
Eske salaıyq, buǵan deıin Ortalyq Quryltaı saılaýy jaqyndaǵan saıyn aqparattyq-manıpýlıatsııalyq naýqandardyń kúsheıýi múmkin ekenin eskertken bolatyn. Saılaý kezeńinde mundaı shabýyldar azamattardyń saılaý protsesine degen senimin tómendetýge baǵyttalady. Olardyń maqsaty — qoǵamda alańdaýshylyq týǵyzyp, syndarly dıalogty ózara aıyptaýlar men ashyq teketires arnasyna burý.
— Jalpy, saılaý naýqany kezeńinde áleýmettik platformalarda, saıttarda jáne ózge de resýrstarda eki júzden astam anonımdi jáne destrýktıvti akkaýnt arqyly taratylǵan shamamen on bes serııaly aqparattyq materıal tirkeldi. Olardyń qatarynda jasandy ıntellekt tehnologııalaryn paıdalaný, manıpýlıatsııalyq aqparat taratý, qujattardy qoldan jasaý, qazaqstandyq jáne sheteldik tanymal tulǵalardyń, sondaı-aq memlekettik organdar basshylarynyń beınesin paıdalana otyryp jasalǵan dıpfeıkter boldy. Olardy beıtaraptandyrý maqsatynda 44 materıal shyqty. Atap aıtqanda, beınerolıkter, nusqaýlyqtar, aqparattyq-aǵartýshylyq posterler, sondaı-aq saılaý naýqany tóńireginde keń taralǵan jáne qaıtalanatyn mıfterdi joqqa shyǵarýǵa, halyqtyń aqparattyq saýattylyǵyn arttyrýǵa baǵyttalǵan jarııalanymdar daıyndalyp, jarııalandy, — delingen habarlamada.
Ortalyq azamattardy anonımdi derekkózderden taralatyn aqparatqa, ásirese emotsııalyq jáne arandatýshylyq sıpattaǵy jarııalanymdarǵa synı turǵydan qaraýǵa shaqyrady.
— Bir habarlamanyń ondaǵan arna men akkaýntta bir mezgilde paıda bolýy onyń shynaıylyǵynyń dáleli sanalmaıdy. Bastapqy derekkózdi tekserińiz, aqparatty resmı derektermen jáne kásibı buqaralyq aqparat quraldarynyń materıaldarymen salystyryńyz. Shynaıylyǵy rastalmaǵan málimetterdi taratpańyz. Anonımdi resýrstarǵa, bot-jelilerge jáne syrtqy manıpýlıatsııa men jalǵan aqparat ortalyqtaryna sizdi destrýktıvti aqparattyq kún tártibin taratý úshin paıdalanýǵa jol bermeńiz, — dep eskertti vedomstvo.
Buǵan deıin qazaqstandyqtar Quryltaı saılaýyna qatysty aqparatty qaıdan alatyny týraly jazǵanbyz.
