Jalǵan aqparat taratyp, halyqty úreılendirýdiń esh paıdasy joq - Mahambet Dosmuhambetov
ATYRAÝ. QazAqparat – Atyraý oblysynyń ákim Mahambet Dosmuhambetov óńir turǵyndaryn jalǵan aqparat taratpaýǵa, saqtyq erejelerin saqtaýǵa shaqyrdy. Bul týraly ákim Facebook paraqshasynda jazdy, dep habarlaıdy QazAqparat.
Ákimniń aıtýynsha, koronavırýs ınfektsııasynyń aldyn alý úshin eki aı buryn oblystyq ákimdikte arnaıy shtab qurylǵan. Karantındik oryndar daıyndalyp, qaýipsizdik sharalary atqarylýda. Halyq kóp shoǵyrlanatyn jerlerge dezınfektsııa jasalyp, sanıtarlyq beketter ashyldy. Qajetti dári-dármek pen apparattar alyndy.
«Bul – arqany keńge salatyn tumaý emes, asa qaýipti ári jyldam taralatyn ınfektsııa. Sondyqtan, jaqyndarymyzdyń qaýipsizdigin erekshe oılaýymyz kerek. Ár azamattyń ózi úshin, otbasy men týǵan-týysy úshin úlken jaýapkershilikti sezinetin mezgil – dál osy ýaqyt. Muny nege aıtyp otyrmyn? Bizge qazir eń aldymen tártip kerek! Qazaqtyń batyr uly Baýyrjan Momyshulynyń ózi «Tártipke baǵynǵan qul bolmaıdy» degenin bilesizder. Sondyqtan, bárimiz tıisti erejelerge baǵynaıyq. Kóp adam jınalatyn is-sharalarǵa, týǵan-týysqa baryp, toı toılaýdy keıinge qaldyrýlaryńyzdy suraımyn. Gıgıenalyq tazalyqqa mán berip, artyq júristi azaıtqan abzal. Barynsha úılerińizde bolyńyzdar. Bizge eń úlken kómekterińiz sol bolmaq. Sonda ınfektsııanyń taralmaýyna, ózgelerdiń ómirine qaýip tóndirmeýge ólsheýsiz úles qosasyzdar» -dep jazdy oblys ákimi Mahambet Dosmuhambetov.
Sondaı-aq, ákim syn saǵatta judyryqtaı jumylý qajettigine toqtaldy.
«Qazir syn aıtyp, min taǵyp otyratyn ýaqyt emes. Jalǵan aqparat taratyp, jamandyq shaqyryp, halyqty úreılendirýdiń esh paıdasy joq. Kerisinshe, syn saǵatta judyryqtaı jumylyp, bir-birimizge qamqorshy, tileýles bolaıyq. Bir-birimizge janashyrlyqpen qaraıyq. WhatsAapr arqyly kelgen baıbalamdarǵa ermeı, aqparatty tek resmı derek kózinen ǵana alýlaryńyzdy suraımyn» -dedi ákim Mahambet Dosmuhambetov.
